Tariki ya 2/4/2026, itsinda ry’abikorera bacururiza muri santeri ya Base bakoreye urugendoshuri mu Karere ka Musanze,mu rugendo baherekejwemo n’Umuyobozi w’Akarere ka Rulindo, Madamu MUKANYIRIGIRA Judith,hamwe n’Umuyobozi w’Akarere wungirije ushinzwe Iterambere ry’Ubukungu, Bwana RUGERINYANGE Theoneste,Uru rugendoshuri rwari rugamije kwiga no kungurana ibitekerezo ku buryo santeri ya Base yavugururwa, cyane cyane mu bijyanye n’imiturire igezweho n’iterambere ry’ubucuruzi.

Iki gikorwa cyanitabiriwe n’abagize Komite Nyobozi y’Urugaga rw’Abikorera (PSF) ku rwego rw’Akarere, hamwe na bamwe mu bakozi b’Akarere ndetse n’ab’Umurenge wa Base.

Abitabiriye uru rugendo bakiriwe n’Umuyobozi w’Akarere ka Musanze wungirije ushinzwe Iterambere ry’Ubukungu, Madamu Uwanyirigira Clarisse, hamwe na Guverineri w’Intara y’Amajyaruguru, Bwana MUGABOWAGAHUNDE Maurice, wari n’umushyitsi mukuru muri iki gikorwa.

Umuyobozi w’Akarere Madamu MUKANYIRIGIRA Judith asobanura ko uru rugendo shuri ruzafasha abikorera bo muri Santeri ya Base kuvugurura iyi santeri mu buryo bw’imiturire ikazaba intangarugero n’ikitegererezo ku zindi santeri zo muri Rulindo.

Yongeyeho ko ibi bishimangira uruhare rw’abikorera mu iterambere ry’igihugu nkuko bikubiye nkingi y’ubukungu  muri gahunda y’igihugu yo kwihutisha iterambere NST2. 

Mu biganiro byatanzwe, abikorera basobanuriwe uko umujyi wa Musanze wavuguruwe, hagizwemo uruhare runini rw’abikorera bafatanyije n’ubuyobozi bw’Akarere. Banagaragarijwe imishinga itandukanye imaze kugerwaho ndetse n’ikiri gukorwa, igaragaza iterambere rishingiye ku bufatanye.

Abikorera basuye imishinga itandukanye, iri mu mujyi wa Musanze ndetse bagirana ibiganiro n’abayobozi, mu rwego rwo gufatira hamwe ingamba zigamije gushyira mu bikorwa amasomo bakuye muri uru rugendoshuri, hagamijwe kuvugurura santeri y’ubucuruzi ya Base.

Mu ijambo rye, Guverineri w’Intara y’Amajyaruguru, Bwana MUGABOWAGAHUNDE Maurice, yashishikarije abikorera gukorera hamwe no kurushaho kunoza imikoranire n’inzego z’ubuyobozi, agaragaza ko ari byo bizihutisha iterambere rya santeri ya Base n’akarere muri rusange.

Abacuruzi bishimiye Uru rugendoshuri  ndetse bemeza ko bungutse  ubumenyi n’ubunararibonye bizabafasha  mu guhindura no guteza imbere santeri ya Base, igahinduka  santeri igezweho kandi ihamye mu bukungu.