Kuri uyu wa kabiri tariki ya 23 Nyakanga 2024, mu ishuri ryisumbuye rya Lycee Notre Dame de la Visitation, riherereye mu Murenge wa Bushoki, Umuyobozi w’Akarere ka Rulindo wungirije ushinzwe imibereho myiza Bwana MUTAGANDA Theophile yatangije ibizamini bisoza icyiciro rusange n’amashuri yisumbuye. Atangiza ibizamini, Umuyobozi w’Akarere wungirije ushinzwe imibereho myiza yifurije abanyeshuri gutsinda ibizamini, abasaba kurangwa n’imyitwarire myiza, kuko aribyo bizabafasha gutsinda ibizamini. Yabasabye kwirinda gusiba ibizamini, gusoma neza amabwiriza agenga ibizamini, mbere yo gutangira gusubiza; kwirinda kugira ubwoba no gukopera kuko byabavutsa amahirwe yo gutsinda ibizamini.

Umuyobozi w'Akarere wungirije ushinzwe imibereho myiza Bwana MUTAGANDA Theophile, ashiyikiriza abanyeshuri ibizamini

Mu Karere ka Rulindo, uyu mwaka abakandida barimo gukora ibizamini bisoza icyiciro rusange n’amashuri yisumbuye babarirwa mu 6,781; barimo abasoza icyiciro rusange 4063, abasoza amashuri y’imyuga n’ubumenyi ngiro (TVET) 1013; abarangije amasomo y’ibaruraramari (accounting) 88 n’abashoje amasomo y’ubumenyi rusange 1617.