Kuva kuri uyu wa mbere mu karere ka Rulindo hatangiye ubukangurambaga bwo kwirinda ibyaha bijyanye no kwangiza ibidukikije n’ibindi byaha bijyanye nabyo.ubu bukangurambaga bufite insanganyamatsiko igira iti: “uruhare rwa buri wese mu gukumira ibyaha bihungabanya ibidukikije n’ibindi byaha by’inzaduka”.

Ubu bukangurambaga bukaba bwarateguwe n’urwego rw’igihugu rw’ubugenzacyaha RIB ku bufatanye n’ikigo cy’igihugu gishinzwe Mine na Peteroli (RMB).hagamijwe gusobanurira abaturage ibijyanye amabwiriza agenga ubucukuzi bw’amabuye y’agaciro na Kariyeri ndetse n’itegeko rigenga ubucukuzi mu Rwanda.

 Mu karere ka Rulindo ubu bukangurambaga bukaba bwaratangiriye mu Murenge wa Murambi mu kagali ka Gatwa, bikaba biteganijwe ko uretse umurenge wa Masoro ubu bukangurambaga buzanabera mu Murenge wa Cyinzuzi na Ntarabana.

BAGIRIJABO Jean D’Amour Ushinzwe ubugenzuzi muri RMB avugako ntamuntu wemerewe gukora ubucukuzi bw’amabuye y’agaciro na Kariyeri atabiherewe uruhushya n’urwego rubifitiye ububasha.Muri ubu bukangurambaga akaba akangurira abaturage kwirinda gukora  ubucukuzi nta ruhushya kuko bigira ingaruka ku banyarwanda bose zituruka ku kwangiza ibidukikije nk’amashyamba ubutaka  no kwangirika kw’ibikorwaremezo.

NTIRENGANYA Jean Claude ushinzwe gukumira ibyaha mu rwego rw’igihugu rw’ubugenzacyaha RIB yasobanuriye abaturage itegeko rigenga ubucukuzi bw’amabuye y’agaciro n’ibihano bihabwa umuntu wahamwe n’icyaha cyo gukora ubucukuzi butemewe n’ibindi byaha bifitanye bijyanye nabyo.

NTIRENGANYA Jean Claude yakomeje abasobanurira ibishingirwaho ngo umuntu yemererwe gupima kwinjira mu bucukuzi bw’amabuye na Kariyeri harimo gupima ubutaka bucukurwa niba bukomeye,ndetse avuga ko n’ababyemerewe bagomba kubahiriza amabwiriza agenga ubucukuzi.

Guverineri w’Intara y’Amajyaruguru MUGABOWAGAHUNDE Maurice wari witabiriye ubu bukangurambaga mu Murenge wa Masoro yibukije abaturage ko kubungabunga ibidukikije ko Atari inshingano z’ubuyobozi gusa, ko ahubwo buri wese agomba kubigira ibye.

Yakomeje asaba abaturage kwirinda ibyaha bakitandukanya n’ibikorwa byo gucukura mu buryo butemewe,anihanangiriza ababyeyi bateshutse ku nshingano zo kurera bakura abana mu mashuri bakabohereza bakabohereza mu birombe, abibutsa ko gukoresha abana imirimo ivunanye bitemewe kandi ko uzabifatirwamo azabihanirwa nkuko amategeko abiteganya.