Mu cyumba cy'inama kuri Nyirangarama, kuri uyu wa 22 Ukwakira 2020,  mu Karere ka Rulindo,  Guverineri  w'Intara y'Amajyaruguru, Bwana GATABAZI Jean Marie Vianney, yayoboye umuhango wo kumurika agatabo gakubiyemo ibigwi by'Abarinzi b'Igihango b'Akarere ka Rulindo no guhemba Imirenge yabaye indashyikirwa mu guteza imbere ibikorwa by'ubumwe n'ubwiyunge mu mwaka w'2019-2020 ariyo, Mbogo na Rusiga yaje ku mwanya wa mbere; Murambi na Ngoma yaje ku mwanya wa kabiri na Masoro yaje ku mwanya wa gatanu.

Ibi bikorwa kumurika agatabo gakubiyemo ibigwi by'Abarinzi b'Igihango b'Akarere ka Rulindo no guhemba Imirenge yabaye indashyikirwa mu guteza imbere ibikorwa by'ubumwe n'ubwiyunge mu mwaka w'2019-2020 byabimburiwe n'ikiganiro kuri Ndi Umunyarwanda  cyayobowe na Guverineri  w’Intara y’Amajyaruguru Bwana GATABAZI Jea Marie Vianney.

Muri iki kiganiro Guverineri Gatabazi yasobanuriye abacyitabiriye ko Ndi Umunyarwanda ishingira ku mateka y'amacakubiri n'ingaruka zayo Abanyarwanda baciyemo, buri wese akamenya ibyakomerekeje mugenzi we; nyuma yo kumenyana, ni bwo abaganira bavurana ibikomere, ahasigaye bakiyemeza gufatanya mu guhangana n'ingaruka z'amacakubiri n'ikindi kintu cyose gishobora kugarura ingengabitekerezo y'urwango hagati yabo, bakiyemeza kubakira ku isano-muzi y’Ubunyarwanda.

Guverineri Gatabazi yagize ati :”Ubunyarwanda ni isano-muzi. Ni isano rikomeye rituma dusangiura urukundo n’ishema mu gihugu cyacu. Ndi Umunyarwanda ni imitekerereze, ni imyumvire n’imyemerere ucengerwa nabyo bikakuyoboramu bikorwa no mu mvugo. Ubunyarwanda tugomba kubuhererekanya, kubuharanira no kububungabunga dukoresheje imbaraga zose zishoboka. Abana tubyara tubigishe indangagaciro na kirazira by’umuco nyarwanda, tubigishe kubaho mu rukundo rwa kivandimwe.”

Guverineri yasobanuye kandi ko Ndi Umunyarwanda ishingiye ku ipfundo ry’ubwizerane n’ubwuzuzanye. Ni ugukunda igihugu, ku gikorera no gusigasira ibyagezweho kandi ugaharanira inyungu rusange z’Abanyarwanda.

Mu buhamya bwatanzwe, hashimangiwe ko mibereho y'abaturage izatezwa imbere no kunga ubumwe, hagarukwa kandi  ku ngamba zituma umuryango nyarwanda ukomeza kuba igicumbi cy'ubumwe n'amohoro  arambye.

Ikiganiro cyitabiriwe n'abagore n'abagabo barenga 130, barimo Abarinzi b'Igihango 67.