Ku wa 03 Kamena 2022 mu busitani bwa Highland Resort, mu Murenge wa Rusiga, hateraniye Inama Mpuzabikorwa y'Akarere ka Rulindo yitabiriwe n'Umunyamabanga wa Leta  ushinzwe imibereho myiza y'abaturage muri Minisiteri y'Ubutegetsi bw'igihugu Madame Ingabire Assoumpta, Umuyobozi w’Urwego rw’Igihugu rw’Imiyoborere Dr. Usta Kaitesi, Abagize Komite Nyobozi y'Akarere, Twice Bde Commander Lt  Col Peter Kabanda n'abandi bahagarariye inzego z'umutekano zikorera mu Karere ka Rulindo.

Iyi nama yahuje Abayobozi b'imidugudu, Abanyamabanga nshingwabikorwa b'Utugari, Abanyamabanga nshingwabikorwa b'imirenge n'abayobozi b'amashami mu Karere.

Mu ijambo rye, Umuyobozi w’Akarere ka Rulindo Madame MUKANYIRIGIRA Judith yibukije ko inama Mpuzabikorwa ari umwanya wo kungurana ibitekerezo ku iterambere ry’Akarere n’ishyirwa mu bikorwa rya gahunda za Leta hagamijwe kunoza imikorere n’imikoranire y’inzego, inzitizi zihari no gutanga ibitekerezo by’uko byakemuka.

Ubutumwa bwatanzwe bwasabye Abayobozi gushyira imbaraga mu gukemura ibibazo bibangamiye imibereho y’abaturage: igwingira, guta ishuri kw’abana, amakimbirane, ihohoterwa rikorerwa abana no kwimakaza isuku.

Umuyobozi wa RGB, Dr Usta KAITESI yagejeje ku bitabiriye inama Ishusho y'imitangire ya serivisi mu Karere, abasaba kutirara mu bipimo abaturage bashima imitangire ya serivisi no kuzamura ibipimo bikiri hasi, yabibukije ko ari inshingano gutanga serivisi nziza,  kwirinda ruswa no gusiragiza umuturage kuko bidindiza iterambere ry’igihugu.

Umunyamabanga wa Leta muri Minisiteri y’Ubutegetsi bw’igihugu Madame Ingabire Assoumpta yasabye abayobozi kurangwa n'imikorere isobanutse, guhanga udushya duhindura imibereho y'abaturage no kuba intangarugero mu baturage. Abayobozi kandi bongeye kwibutswa gukomeza kugira uruhare mu kubungabunga umutekano.

Muri iyi nama kandi hahembwe imidugudu 17 yabaye intangarugero mu mikorere y'umugoroba w'imiryango, aho buri mudugudu 1 mu Murenge wahawe certificate y'ishimwe na sheki y'amafaranga 100,000 azafasha mu kongerera ubushobozi ingo mbonezamikurire hagamijwe kurwanya igwingira mu bana.