kuri uyu wa gatatu ubuyobozi bw’Akarere ka Rulindo bwagiranye inama n’ubuyobozi bwa Trinity Metals Ltd hagamijwe kurebera hamwe uburyo bwo kurushaho guteza imbere ubufatanye mu guteza imbere imibereho myiza y’abaturage.

Iyi nama yitabiriwe n’Umuyobozi w’Akarere ka Rulindo, Madamu Mukanyirigira Judith, ari kumwe n’Umuyobozi w’Akarere wungirije ushinzwe Iterambere ry’Ubukungu, Bwana Rugerinyange Théoneste, Umuyobozi wa Polisi mu Karere SP Jean Claude Gakwandi, ndetse n’abandi bagize inzego z’umutekano.

Ku ruhande rwa Trinity Metals Ltd, inama yitabiriwe n’Umuyobozi Mukuru w’iki kigo, Peter Geleta, hamwe n’abakozi batandukanye bacyo.

Ibiganiro by’impande zombi byibanze ku gushimangira ubufatanye hagati y’Akarere na Trinity Metals Ltd, hagamijwe ko ibikorwa by’ubucukuzi bw’amabuye y’agaciro byarushaho kugira uruhare mu guteza imbere imibereho myiza y’abaturage batuye mu bice bikorerwamo. Hanarebwe uburyo bwo gukomeza gukemura ibibazo bishobora kubangamira imibereho y’abaturage, ndetse no kunoza imikoranire mu gushyira mu bikorwa gahunda z’iterambere.

Iyi nama kandi yagarutse ku ruhare rw’ubufatanye mu gushyigikira gahunda y’igihugu yo kwihutisha iterambere, NST2, ndetse no gufatanya mu ishyirwa mu bikorwa rya gahunda y’iterambere ry’Akarere (DDS).

Mu ijambo rye, Umuyobozi Mukuru wa Trinity Metals Ltd, Peter Geleta, yashimye ubufatanye bwiza bagaragarizwa n’Akarere ka Rulindo, by’umwihariko uruhare rw’Akarere mu gukumira abakora ubucukuzi bw’amabuye y’agaciro butemewe. Yanashimangiye ko u Rwanda ari igihugu cyiza cyo gushoramo imari, anagaragaza ko Trinity Metals izakomeza gukorana bya hafi n’Akarere mu guteza imbere ubukungu n’imibereho myiza y’abaturage.

Impande zombi zemeranyije gukomeza gushimangira imikoranire hagamijwe ko ibikorwa by’ubucukuzi bw’amabuye y’agaciro byagira uruhare rufatika mu iterambere rirambye ry’Akarere n’imibereho myiza y’abaturage.