Kuri uyu wa mbere tariki ya 20/02/2023, mu mirenge yose igize Akarere ka Rulindo hatangijwe ubukangurambaga bw'icyumweru (20-24/02/203) bugamije gukangurira ababyeyi kwitabira gahunda y'imbonezamikurire y'abana bato mu midugudu aho batuye.

Insanganyamatsiko igira iti: " Mubyeyi sobanukirwa uruhare rwawe mu kurinda umwana imirire mibi no kwita ku mikurire ye."

Ku rwego rw'Akarere igikorwa cyabereye mu Murenge wa Masoro; aho Umuyobozi w'Akarere Madamu MUKANYIRIGIRA Judith ari kumwe n'umuyobozi w'Akarere wungirije ushinzwe imibereho myiza Bwana MUTAGANDA Theophile, na bamwe mu bagize inama y'umutekano y'Akarere, Abanyamabanga Nshingwabikorwa b'imirenge n'abafatanyabikorwa barimo Gikuriro kuri Bose, Caritas Rwanda, Ineza Foundation, Rutongo Mines na Isoko Community Development bifatanyije n'abaturage mu gusura ECD Center Iriba, gusura Home Based Benimana, gusura Rutongo ECD Center na Isooko Work Place ECD.

Muri izo ECDs zasuwe, abana bagaburiwe indyo yuzuye, bahabwa amata, bapimwa n'imikurire yabo ; ababyeyi bahabwa inyigisho zibakangurira kwita ku mikurire y'abana no kubarinda imirire mibi.

Abayobozi kandi bagiranye ibiganiro n'abaturage b'Umurenge wa Masoro bahabwa ubutumwa bubakangurira kurwanya igwingira n'imirire mibi cyane cyane bita ku buzima bw'umwana mu minsi 1000 kuva agisamwa.

Abaturage bibukijwe ko ubushakashatsi bwakozwe bwagaragaje ko 30% y'abana bo mu Karere ka Rulindo bafite igwingira, basabwa kugira uruhare mu guhashya iryo gwingira kuburyo mu mwaka wa 2024 byibura abo bana bazaba bageze ku kigero cya 19%.

Umuyobozi w'Akarere yasabye ababyeyi kwitabira ECD bakiga gutegura indyo yuzuye kandi bakayitegurana isuku kuko igihe cyose umwana agaburiwe ibifite umwanda bimudindiza mu mikurire arwaye indwara ziterwa n'umwanda. Yashimiye imiryango yemeye gutanga ingo zabo zihatangirwamo serivisi za gahunda mbonezamikurire y'abana; asaba buri mubyeyi ufite urugo rwafasha abana kubikorana urukundo nawe akarutiza ababyeyi.

Ubu bukangurambaga bwitezweho kuzamura ubwitabire bw'abana bitabira gahunda mbonezamikurire; kuri buri mudugudu hakaba hari ECDs 3 zikora neza.

Ibikorwa byashojwe Abanyamabanga Nshingwabikorwa bishimira amasomo bakuye mu rugendoshuri bakoze, biyemeza ko nabo bagiye kubishyira mu bikorwa mu mirenge bayobora, cyane ko basanze nta ngengo y'imari isabwa ngo ECDs zikore neza, ahubwo ko bisaba kumva neza akamaro ka ECDs no kwiyemeza.