Mu ruzinduko abadepite bagize komisiyo y’Ububanyi n’Amahanga Ubutwererane n’Umutekano bagiriye mu karere ka Rulindo hagamijwe gusesengura ikibazo cy’ubujuru n’ubucukuzi butemewe bw’amabuye y’agaciro bashimye ingama zafashwe n’ubuyobozi bw’Akarere ku bufatanye n’izindi nzego mu kurwanya ubucukuzi butemewe.

Itsina ry’Abadepite rigizwe na  Hon UWINGABE Solange  hamwe na Hon MUNYANDAMUTSA Jean  Paul ubwo ryaganiraga n’ubuyobozi bw’Akarere, inzego z’Umutekano,abakora mu bucukuzi bw’amabuye y’agaciro ndetse n’abagize urugaga rw’abikorera, abadepite bagaragarijwe uko ikibazo cy’ubucukuzi butemewe bw’amabuye y’agaciro  ndetse n’icyubujura bihagaze mu Karere banagaragarizwa ingamba zagiye zifatwa zo guhangana n’iki kibazo ndetse n’Imbogamizi zihari zitamu abakora ubucukuzi butemewe badahagarara burundu.

Nyuma yo kugaragarizwa ibimaze gukorwa ,Abadepite basuye ahakorerwa ubucukuzi butemewe bw’amabuye y’Agaciro mu mirenge itandukanye harimo ahacukurwa zahabu mu murenge wa Rukozo no mu murenge wa Masoro hacukurwa gasegereti na cariyeri.

Nyuma yo gusura ahacukurwa mu buryo butemewe mu murenge wa Masoro abadepite baganiriye n’abayobozi mu byiciro bitandukanye muri uyu Murenge, harebwa icyakorwa mu rwego rwo guhashya burundu abakora ubucukuzi butemewe bw’amabuye y’Agaciro.

Hon.UWINGABE Solange yavuze ko Abadepite bagize komisiyo y’Ububanyi n’Amahanga Ubutwererane n’Umutekano bahagurukijwe n’ibibazo bibiri byagaragaye nyuma y’ingendo z’abadepite zakozwe mu gihugu hose  mu mpera z’ukwezi kwa gatanu no mu ntangiriro z’ukwezi kwa gatandatu  bikagaragara ko ubujuru n’ubucukuzi butemewe bw’amabuye y’Agaciro ari ikibazo gikomeye.

Yakomeje avuga ko nubwo mu karere ka Rulindo hari ubucukuzi butemewe bw’amabuye y’agaciro bidakabije cyane ugereranyije n’ahandi kuko ubuyobozi bw’Akarere bufatanyije n’izindi nzego bwafashe ingamba ndetse bashyiramo imbaraga nyinshi zo kubihashya.