Kuri uyu munsi  tariki ya 1 gashyantare mu mirenge yose igize Akarere ka Rulindo hizihijwe umunsi mukuru  w’intwari z’igihugu. ku rwego rw’Akarere uyu munsi ukaba wizihirijwe mu murenge wa Cyungo.aho ibirori byo kwizihiza uyu munsi byitabiriwe n’abayobozi batandukanye barimo n’intumwa za Rubanda. insanganyamatsiko y’uyu mwaka ikaba igira iti: “Ubutwari n’ubumwe bw’Abanyarwanda Inkingi z’iterambere”

Umuyobozi w’Akarere ka Rulindo Madamu MUKANYIRIGIRA Judith mu ijambo yagejeje ku bitabiriye ibi birori yagarutse ku mateka y’ubutwari bw’abanyarwanda kuva  mu gihe cy’abami  byumwihariko muri aka gace umurenge wa cyungo uherereyemo.

Umuyobozi w’Akarere akaba yavuze ko impamvu uyu mwaka bahisemo ko ibirori byo kwizihiza umunsi w’intwari  bibera mu murenge wa cyungo byatewe n’ibikorwa ndetse n’amateka yihariye yaranze umurenge wa cyungo ndetse n’indi mirenge bihana imbibi.

Madamu MUKANYIRIGIRA Judith yavuze ko muri uyu murenge arihohari igiti cy’umwungo cyarambuwemo ingoma y’ingabe yitwa Karinga kungoma y’umwami Ruganzo Ndori wa II mu mwaka wa 1510,iyo ngoma y’ingabe yasimbuye ingoma yitwaga Rwoga  ubwo yarimaze kunyagwa n’abanyabungo.Umwami Ruganzu Ndori wa II akaba ari mubagaruye igihugu akanacyagura atsinze abanyabungo bari bamaze igihe barakinyaze.

Akandi gace  gafite amateka y’ubutwari bw’abanyarwanda ni agace kahitwa imushongi mu murenge wa Base hari ubutare bwifashishwaga mu gucura intwaro zakoreshwaga mu rugamba rwo kwagura igihugu kungoma y’umwami Ruganzu Ndori.

Mu rugamba rwo kubohora igihugu umurenge wa cyungo wari umwe mu duce ingabo za RPA zakoreshaga ubwo zarimo zisatira umujyi wa Kigali.

Honorable NKURANGA Egide mu kiganiro yahaye abitabiriye ibi birori yagarutse ku mateka y’uRwanda by’umwihariko amateka y’urugamba rwo kubohora igihugu ari naryo zingiro ry’uyu munsi mukuru w’intwari z’uRwanda ndetse agaruka ku byiciro by’intwari twizihiza kuri uyu munsi byumwihariko ku bigwig n’utwari  bya Fred GISA RWIGEMA watangije urugamba rwo kubohora igihugu ndetse n’ubutwari bwa UWIRINGIYIMANA Agatha hamwe n’ubutwari bw’abanyeshuri b’inyange nizindi ntwari z’igihugu

Honorable Theogene MUNYANGEYO wari umushyitsi mukuru muri ibi birori  mu ijambo rye yagarutse ku nsanganyamatsiko y’uyu mwaka yibutsa abitabiriye ibi birori byumwihariko abakiri bato kugira imyitwarire myiza ibereye umunyarwanda no guharanira kuba intwari bakirinda amacakubiri n’ubunebwe bagaharanira gukora bakitezimbere ndetse bagatezimbere igihugu.

Ibirori byo kwizihiza umunsi w’intwari mu karere ka Rulindo byabanjirijwe nijoro ry’igitaramo cyabereye mu kigo cy’ishuri rya INYANGE Girl’s School iki gitaramo kikaba cyari cyanitabiriwe n’umuyobozi w’intara y’amajyaruguru MUGABOWAGAHUNDE Maurice hamwe n’abandi bayobozi.