Kuri uyu wa 3 ukuboza 2025 mu Karere ka Rulindo hizihijwe Umunsi Mpuzamahanga wahariwe Abafite Ubumuga,ku nsanganyamatsiko igira iti: “Dushyigikire Umuryango Udaheza Abantu bafite Ubumuga, Duteze Imbere Imibereho Myiza”

uyu munsi  ku rwego rw'Akarere wizihirijwe mu murenge wa Bushoki mu gihe ibirori byo kwizihiza uyu munsi byabanjirijwe no gusura Ikigo cy’Ishuri cya Rukingu giherereye mu Murenge wa Rusiga,  gifite umwihariko wo kwita ku bana bafite ubumuga binyuze muri gahunda y’Uburezi Budaheza. umuyobozi w'Akarere MUKANYIRIGIRA Judith arikumwe n'Umuyobozi w'Akarere wungirije ushinzwe imibereho myiza y'Abaturage MUTAGANDA Theophile n'Umuyobozi wa Polisi mu Karere n'abandi bayobozi bashimye intambwe iki kigo kigezeho mu gufasha abana bafite ubumuga kubona uburezi bufite ireme.

 kwizihiza uyu munsi mpuzamahanga w'Abafite ubumuga  mu karere ka Rulindo wabaye ,  umwanya wo gutanga ibikoresho bitandukanye byo gufasha abafite ubumuga, birimo ibikoresho biborohereza mu buzima bwa buri munsi n’ibibafasha mu kwiteza imbere.

Mu ijambo rye, Umuyobozi w’Akarere  MUKANYIRIGIRA Judith yasabye abafite ubumuga kwigirira icyizere, bakumva ko bafite ubushobozi bwo kugera ku ntego zabo, nk’abandi bose. Yabibukije ko Leta y’u Rwanda ibafata nk’ingenzi mu iterambere ry’igihugu, abasaba gukomeza kugira uruhare mu kugera ku Cyerekezo cy’Igihugu 2050.

Ati:"Ubumuga si intege nke. Mufite ubushobozi, mufite impano, kandi mugomba kwigirira icyizere kuko namwe mufite uruhare rukomeye mu iterambere ry’igihugu cyacu."

Ubuyobozi bw’Akarere bwashimiye  abafatanyabikorwa, imiryango itegamiye kuri Leta n’abaturage muri rusange uburyo bakomeza gufatanya n’inzego z’ubuyobozi mu guteza imbere imibereho myiza y’abafite ubumuga, no kubaha amahirwe angana n’abandi mu burezi, umurimo n’imibereho rusange.