kuri uyu wa kabiri Abahagarariye Abunzi ku rwego rw’Umurenge n’AKagali mu karere ka Rulindo bahawe amahugurwa yo gukumira no kurwanya Ruswa. Ni amahugurwa yateguwe n’urwego rw’umuvunyi kubufatanye na minisiteri y’ubutabera. Afite insinganyamatsiko igira iti: Twimakaze indangagaciro zo kurwanya ruswa inkingi y’iterambere rirambye.

 Umuyobozi mukuru  ushinzwe gukumira no kurwanya ruswa mu rwego rw’Umuvunyi BIRASA Fiscal Jacques yasabye abunzi gukomeza kongera kongera icyizere abaturage babafitiye hagendewe ku bipimo byagaragajwe n'ubushakashatsi bwa RGB Bwo  mu mwaka wa 2024  ku bijyanye n’uburyo abaturage bishimira serivisi bahabwa.

 Ubushakashatsi bwagaragaye ko abunzi bafitiwe icyizere ku kigero cya 85%, abanenga bakaba 14,9%, naho ku bijyanye n’ubunyangamugayo bakaba barishimiwe ku kigero cya 84.1%,  ababunenga bakaba 15.9%.

Mu gukemura ibibazo by’abaturage ku gihe bakaba barashimwe ku kigero cya 83.5 naho abanenga bakaba 16.4%. 

Bamwe mu bunzi bagaragaza ko bimwe mu byateye uko kugabanuka kw’abishimira serivise z’urwego rw’Abunzi ari uko abakora ubushakashatsi begera abantu bataranyuzwe n'imyanzuro bigatuma babigenderaho bagaragaza ko batishimiye imikorere yabo

 UWAMARI YA Dative umwunzi ukorera mu karere ka Rulindo avuga ko akenshi ubushakashatsi bukorerwa   ku bantu baba bataranyuzwe n’imyanzuro  ariko akavuga ko bishoboka ko hari na bamwe muri bagenzi babo bakoresha nabi inshingano  zabo bakazikora mu nyungu zabo.

Muri aya mahugurwa hasobanuwe ko  yateguwe hashingiwe ko ugereranyije n'umwaka wabanje wa 2023, byagaragaye ko imibare y'abishimira imikorere y'abunzi muri rusange yagabanutse aho icyizere cyari 87.9%, ubunyangamugayo ari 87.2%, ndetse no mu gukemura ibibazo by’abaturage ku gihe bikaba byari ku kigero cya 83,5%.

Ibi bigaragaza ko mu gihe cy’umwaka umwe gusa imibare y’abashima yagabanutseho, naho abanenga bakiyongera.

Aya mahugurwa agamije  ku gusobanura imikorere y'abunzi ishyira Umuturage ku isonga  no kumuha ubutabera bunyuze mu mucyo kandi butangiwe ku gihe.