Kuri uyu wa kane Umuyobozi w’Akarere Wungirije Ushinzwe Iterambere ry’Ubukungu  RUGERINYANGE Theoneste hamwe hamwe n’umuyobozi mukuru w’imirimo rusange  NSANZAMAHORO Erneste n’abashinzwe ubuhinzi ku karere no mu mirenge batangiye urugendoshuri rw'iminsi 2 mu turere twa Musanze na Rubavu. 

Ni urugendo shuri rwateguwe ku bufatanye bw’Akarere ka Rulindo na CARITAS Byumba muri gahunda y’umushinga w’Akarere watewe inkunga n’umuryango w’ubumwe bw’uburayi. 

Uru rugendo shuri rwitabiriwe n’abakozi bahoraho b’umushinga, Abanyamabanga Nshingwabikorwa n’abakozi bashinzwe ubuhinzi mu mirenge ya Kisaro na Bushoki uyu mushinga ukoreramo, ndetse n’abahagarariye amakoperative (COMIXBU na KOAHIRU) akorana n’uyu mushinga. 

Uru rugendo shuri rwitabiriwe kandi n’Abakozi b’Akarere bafite ishyirwa mu bikorwa ry’uyu mushinga mu nshingano zabo na SEDO b'Utugari twa Kigarama na Gasiza.

Kwikubitiro  hasuwe Ikigo cya RAB / Station ya Musanze ahasuwe uburyo bukoreshwa mu butubuzi bw’imbuto nziza y’ibirayi,hanasurwa  Rwiyemezamirimo NZABIRINDA Isaac  ukora ubutubuzi bw’imbuto y’ibirayi hifashishijwe uburyo bwo guhinga mu nzu (greenhouses). 

Umuyobozi wa RAB/Musanze station Bwana Aimable Rukundo yashimiye Akarere na CARITAS bateguye urugendoshuri ndetse abizeza  ko bazakomeza gufatanya n'Akarere mu ishyirwa mu bikorwa ry'uyu mushinga. 

Nyuma yo kuva I Musanze bakomereje mu karere ka Rubavu ahasuwe  Umushoramari Hand in Hand for Development Ltd nawe  ukora ubutubuzi bw’imbuto y’ibirayi hifashishijwe greenhouse.banasura ahatunganyirizwa ifumbire yifashishwa muri ubu buhinzi bwo mu nzu (fertigation). Ndetse berekwa uburyo hifashishwa iminyorogoto mu gukora ifumbire ikomoka ku myanda ibora.

Abitabiriye urugendoshuri bishimiye ubumenyi bahakuye,bimeza ko ibyo bize bizabafasha mu gukomeza kunoza ishyirwa mu bikorwa ry'uyu mushinga wo gutubura imbuto y'ibirayi watewe inkunga n’umuryongo w’Ubumwe bw’Uburayi EU.