Ku wa 17 Ukuboza 2025, Urukiko Rukuru rwaburanishije mu ruhame abantu 10 bakekwaho ibyaha byo gukubita no gukomeretsa, mu rubanza rwabereye mu Karere ka Rulindo hagamijwe kwegereza ubutabera abaturage no kubigisha amategeko.

Uru rubanza rwayobowe na Madamu Mukamuhire Pascasie afatanyije n’abandi bayobozi b’urukiko, aho ababuranyi bari barajuririye imyanzuro y’Urukiko rw’Isumbuye rwa Gicumbi. Mbere y’iburanisha, abaturage bahawe ikiganiro ku gukemura amakimbirane hatisunzwe inkiko.

Ubushinjacyaha n’ababuranyi bagaragaje impamvu z’impande zombi, mu gihe urukiko rwatangaje ko ruzafata umwanzuro rushingiye ku mategeko n’ibimenyetso byatanzwe. 

Abaturage bitabiriye uru rubanza bashimye gahunda yo kuburanisha mu ruhame, bavuga ko ibafasha gusobanukirwa amategeko n’akamaro ko kwirinda urugomo no gukemura amakimbirane mu mahoro.

Ababuranyi baburanishijwe ni abantu icumi (10), barimo batandatu (6) bari baturutse mu Igororero rya Gicumbi, ndetse n’abandi bane (4) baburanaga badafunze (baburana bataha). Bose bari barajuririye Urukiko Rukuru ku myanzuro yari yafashwe n’Urukiko rw’Isumbuye rwa Gicumbi, ku byaha byo gukubita no gukomeretsa ndetse no guhoza ku nkeke.