Kuri uyu wa kabiri  ku rwibutso rwa jenoside rwa Cyinzuzi  abakirisitu b’itorero rya ADEPR Betel paruwasi ya Remera ururembo rwa Gicumbi mu murenge wa Ngoma  bibutse ku nshuro ya 31  abari abakirisitu bishwe muri jenoside yakorewe abatutsi mu Rwanda.

Ni igikorwa cyitabiriwe n’umuyobozi w’Akarere wungirije ushinzwe imiberteho myiza y’Abaturage MUTAGANDA Theophile na Perezidante wwa IBUKA mu karere ka Rulindo ndetse n’umushumba mukuru w’itorero rya ADEPR mu Rwanda  Rev. NDAYIZEYE  Isaie

MUREBWAYIRE Alphonsine uhagarariye IBUKA mu karere ka Rulindo  yagaragaje ko muri jenoside yakorewe Abatutsi  hari abakirisitu bagize uruhare mu kwica bagenzi babo basenganaga asaba abakirisitu kurwanya no kwirinda ingengabitekerezo ya jenoside. 

Umushumba mukuru w’itorero rya ADEPR mu Rwanda  Rev. NDAYIZEYE Isaie yihanganishije imiryango yabuze ababo muri jenoside yakorewe abatutsi ndetse asaba abakirisitu b’Itorero rya ADEPR kwimakaza urukundo bakiranda urwango n’amacakubiri kandi bakagerageza kwerera imbuto bagenzi babo.

Umuyobozi w’Akarere wungirije ushinzwe imibereho myiza y’Abaturage MUTAGANDA Theophile  yashimiye  itorero rya ADEPR Betel paruwasi ya Remera yateguye igikorwa cyo kwibuka ku nshuro ya 31 jenoside yakorewe abatutsi mu Rwanda ,ariko abasaba ko bakomeza gutanga umusanzu wabo mu rugamba rwo kurwanya abahakana bakanapfobya jenoside yakorewe Abatutsi mu Rwanda

Iki gikorwa cyo kwibuka ku nshuro ya 31 jenoside yakorewe abatutsi itorero rya ADEPR Betel yamurikiye amazu 5 yasaniye abacitse ku icumu batishoboye bo mu Murenge wa Cyinzuzi,Akagari ka Migendezo, Umudugudu wa Remera.