Mu nama yahuje ubuyobozi bw’Akarere n’inzego zikora muri serivisi z’ubuzima mu karere ka Rulindo biyemeje gufatanya mu guhangana n’indwara z’ibyorezo binyuze mu mu gukora ubugenzuzi buhoraho no guhugura ibyiciro bitandukanye by’abakora muri serivise z’ubuzima.  

Iyi nama ikaba yitabiriwe n’abayobozi b’ibitaro barimo umuyobozi mukuru w’ibitaro by’intara y’Amajyaruguru  bya kinihira n’umuyobozi mukuru w’ibitaro by’Akarere bya Rutongo ndestse n’abafatanyabikorwa mu rwego rw’ubuzima barimo PROFEMME TWESE HAMWE ,Health builders ndetse na UNICEF n’abandi batumirwa bakora mu nzego zitandukanye

Abashinzwe gukumira indwara z’ibyorezo mu bitaro bya Rutongo na Kinihira bagaragaza ko kuva mu ntangiriro z’uyu mwaka wa 2025 indwara z’ibyorezo nka MARBURG na MPOX zagabanutse cyane mu gihe indwara ya Maliria yo yiyongereye ku kigero cyo hejuru.

MANISHIMWE Alexis uhagarariye ikigo cy’igihugu gishinzwe kwita ku buzima mu Rwanda RBC avugako mu mu myaka itanu ishize mu Rwanda habaye icyorezo cya covid 19 cyatumye abanyarwanda barushaho gukanguka mu rwego rwo kwirinda ko hagira indi ndwara iza abantu batayifiteho amakuru ngo ishobore kwirindwa no kuyikumira itarakwira mu baturage. Ngo ibi byatumye ikigo cy’igihugu cyita ku buzima RBC gishyiraho muri buri bitaro   itsinda ry’abantu batanu bashinzwe gukurikira no gusesengura amakuru y’indwara zigaragara mu bitaro.

MANISHIMWE Alexis yakomeje avuga ko mu rwego rwo gukumira no kurwanya indwara z’ibyorezo hateguwe amahugurwa azahabwa abakozi bo mu bitaro barimo abashinzwe gutanga imiti ,abaganga bakira indembe ndetse n’abakora muri laboratwari aba nabo bakazahugura abandi bakora muri serivisi z’ubuvuzi. 

BUSINGE Justine uhagarariye umuryango PROFEMME TWESE HAMWE ushinzwe kurandura Malariya mu ntara y’Amajyaruguru avuga ko mu rwego rwo kurandura malariya hakozwe ubukangurambaga bwo kwirinda malariya  ndetse n’inama zitandukanye mu baturage batuye mu bice byagarayemo indwara ya Malariya aho nko mu Karere ka Rulindo ubukangurambaga bwakorewe mu murenge wa Masoro kandi bakaba bizeye ko bizatanga umusaruro. 

Umuyobozi w’Akarere wungirije ushinzwe imibereho myiza y’Abaturage MUTAGANDA Theophile yashimiye abakora mu nzego z’ubuzima mu karere ndetse n’abafatanya bikorwa ku ruhare bagira mu kurwanya no gukumira indwara z’ibyorezo ndetse abasaba gukomeza ubufatanye mu guhangana n’ibyorezo kandi bagahora biteguye kuko bidateguza yongeraho ko gukumira no kurwanya indwara z’ibyorezo biri mu nshingano za buri munyarwanda wese kuko ibyorezo biri mu bibangamira imibereho myiza y’abaturage.