Kuri uyu wa kane umuyobozi w'akarere madam MUKANYIRIGIRA Judith yakiriye itsinda ry'abanyeshuri n'abayobozi bo mu ishuri rya gisirikare rya Nyakinama baje m’urugendoshuri ku bikorwa by'ubuhinzi mu bikorerwa mu karere ka Rulindo.

Iri tsinda rikaba ryari rigizwe n'abasirikare 42 baturuka mu bihugu 9 birimo URwanda,Mozambique,kenya,Ghana,ubwami bwa Eswatini,Ethiopia,Uganda,Tanzania na Mali.

Iri tsinda ryari riyobowe na Captain GASU ukomoka mu gihugu cya Ghana rikaba ryaje riherekejwe n'umuyobozi mukuru wungirije ushinzwe iterambere ry'ubukungu mu kigo cy'igihugu gishinzwe ubuhinzi n'ubworozi mu Rwanda RAB Dr .Florence UWAMAHORO. 

Umuyobozi w'akarere wungirije ushinzwe iterambere ry'ubukungu RUGERINYANGE Theonest yagaragarije abagize iri tsinda uko ishusho y'ubuhinzi n'ubworozi bihagaze mu karere ,agaragaza ibyakozwe,ibiteganywa gukorwa ndetse n'imbogamizi zibangamira ubuhinzi n'ubworozi mu karere ka Rulindo.

Nyuma yo kungurana ibitekerezo no gusobanurira aba banyeshyuri ku bibazo bibazaga iri tsinda ryahise rikomeza igikorwa cyo gusura ibikorwa bya Sina Gerard Enterprise,utunganya umusaruro ukomoka ku buhinzi,baganira nawe abasobanurira uburyo ahinga ndetse akanatunganya umusaruro.

Umuyobozi w’iri tsinda Captain GASU yashimye urwego rw’ubuhinzi ndetse na gahunda yo gushyira ibihingwa n’amatungo mu bwishingizi izwi nka Tekana avuga ko ari gahunda nziza babonye mu Rwanda.  Captain GASU yashimye ibikorwa bya Sina Gerard ndetse yiyemeza kuzagaruka gusura sina Gerard enterprise.