Kuri uyu wa kabiri Umuyobozi w’Akarere, Madamu MUKANYIRIGIRA Judith, ari kumwe  n'abagize inzego z’umutekano, yakiriye itsinda ry’abapolisi bakuru baturutse mu Ishuri rikuru rya Polisi, National Police College (NPC Musanze)

iri tsinda ryari  riyobowe na C.P Christophe BIZIMUNGU Commandant wa National Police College (NPC Musanze) hamwe na SSP Prudence NGENDAHIMANA umuyobozi mukuru wa Polisi wungirije mu ntara y'Amajyaruguru .

Abo bapolisi bakomoka mu bihugu 10 bitandukanye byo ku mugabane wa Africa, aribyo central Africa,Eswatini,Kenya,Malawi Namibia,Somalia,South Sudan,The Gambia,Uganda n'u Rwanda  bari mu mahugurwa ya Police Senior Command Course mu ishuri rya National Police College (NPC Musanze) . Basuye Akarere mu rwego rwo gukora ubushakashatsi kubirebana n'uburyo uRwanda rushyira mu bikorwa ingamba zo Kwishakamo ibisubizo (Home Grown Solutions), hagamijwe gukura amasomo ku miyoborere ishingiye ku bufatanye bw’abaturage n’inzego z’ubuyobozi.

Nyuma yo gusobanurirwa imikorere y’Inteko z’Abaturage, Komite z’Abunzi n’Umugoroba w’Imiryango, abo bapolisi bakurikiranye uko abunzi bakemura amakimbirane hagati y’abaturage mu murenge wa Shyorongi  ndetse n’uko abayobozi bafatanya n’abaturage gukemura ibibazo byugarije imiryango binyuze mu nteko y'abaturage mu murenge wa Bushoki. Aba bapolisi  basobanuriwe uruhare rw’inzego z’ibanze mu kubungabunga umutekano n’imibereho myiza y’abaturage.

Umuyobozi w’Akarere yashimiye iri tsinda kuba barahisemo gusura akarere ka Rulindo , anagaragaza ko gahunda zishingiye ku muco n’imibereho y’abaturage zifasha cyane mu gukemura ibibazo bitandukanye birimo amakimbirane yo mu miryango, umutekano n’iterambere rusange.

Ku ruhande rw’iri tsinda ry’abapolisi, bagaragaje ko bungutse ubumenyi n’ubunararibonye bushobora kubafasha mu kazi kabo mu bihugu bakomokamo, cyane cyane mu gushyira imbere uruhare rw’abaturage mu kubaka amahoro n’umutekano urambye.