Mu rwego rwo guteza imbere ireme ry’uburezi no kugabanya ubucucike bw’abanyeshuri mu mashuri, kuri GS Burehe hatashywe ku mugaragaro ibyumba 6 by’amashuri bishya, bizafasha kunoza imyigire n’imyigishirize.

Ibi byumba byubatswe ku nkunga y’Intara ya Rhineland-Palatinate yo mu Germany, binyuze mu muryango w’Abadage wa Fly & Help usanzwe ukorana na Diyoseze ya Byumba mu guteza imbere ibikorwa by’uburezi.

Mu muhango wo gutaha aya mashuri, Umuyobozi w’Umujyi wa Hachenburg, Stefan Leukel, wari uhagarariye Intara ya Rhineland-Palatinate, yashimye ubufatanye bukomeje kuranga ibihugu byombi, by’umwihariko uburi hagati y’Intara ya Rhineland-Palatinate n’Akarere ka Rulindo. Yashishikarije abana gukoresha neza aya mahirwe mashya bahawe, bakiga bashyizeho umwete kugira ngo bazavemo abayobozi n’abanyamwuga bazubaka igihugu.

Abayobozi batandukanye bitabiriye uwo muhango bagaragaje ko kubaka ibyumba bishya ari intambwe ikomeye mu gukemura ikibazo cy’ubucucike bwari busanzwe bugaragara kuri GS Burehe, bikaba biteganyijwe ko bizazamura ireme ry’uburezi no gutanga umusaruro ushimishije mu mitsindire y’abanyeshuri.

Umuyobozi w’Akarere Madamu MUKANYIRIGIRA Judith yavuze koi bi byumba by’Amashuri byatashywe  ari gice cy’ubufatanye bumaze igihe kirekire kandi bwageze ku musaruro ugaragara mu Karere. yagize ati: “Binyuze mu nkunga y’Intara ya Rheneland palatinate hamaze kubakwa ibyumba by’amashuri 105 n’ubwiherero 85 mu bigo by’amashuri bitandukanye byo mu Karere ka Rulindo”. 

Umuyobozi w'Akarere yongeyeho ko  haranatanzwe ibikoresho bitandukanye  birimo intebe n’ameza, ibigega by’amazi ndetse n’ibindi bikoresho by’ingenzi, byose bikaba byaragize uruhare rukomeye mu kunoza no guteza imbere imyigire y’abanyeshuri.

Nyuma yo gutaha ibi byumba, intumwa zakomereje urugendo rwazo kuri EP Buhande, aho zasuwe ibyumba 12 by’amashuri byubatswe mu myaka itandukanye, harimo n’ibyumba 3 byuzuye muri uyu mwaka w’ingengo y’imari. Abayobozi bagaragaje ko ibikorwa nk’ibi bigaragaza ubufatanye bwiza n’icyerekezo cyiza cyo gukomeza gushora imari mu burezi, nk’inzira irambye yo guteza imbere imibereho y’abaturage.