Ejo kuwa mbere tariki ya 7 mata 2025 haratangira ibikorwa byo kwibuka ku nshuro ya 31 jenoside yakorewe abatutsi mu 1994,mu gutangiza ibikorwa byo kwibuka  mu Karere ka Rulindo, bizatangirira ku biro by'Umurenge wa Rusiga henyegezwa urumuri rw'icyizere.

Nyuma y'uyu muhango ibikorwa byo gutangiza icyunamo bizakomereza  ku Rwibutso rwa Jenoside yakorewe Abatutsi ruri mu Murenge wa Mbogo. 

Urwibutso rwa Mbogo ni rumwe mu nzibutso za Jenoside yakorewe abatutsi esheshatu (6) zizasigara mu Karere ka Rulindo nyuma yo guhuza inzibutso umunani (8) zari zisanzwe ziri mu Karere ka Rulindo.

Kwibuka ku nshuro ya 31 Jenoside yakorewe Abatutsi mu 1994 mu Karere ka Rulindo hateganijwe ibikorwa bitandukanye birimo gusura inzibutso no kunamira abazize Jenoside yakorewe Abatutsi mu 1994 ndetse no gushyingura mu cyubahiro imibiri y'abazize Jenoside yakorewe Abatutsi bizaba tariki ya 17 niya 30 Gicurasi 2025 mu Rwibutso rwa Jenoside yakorewe Abatutsi rwa Rusiga .