Kuri uyu wa kabiri Guverineri w’intara y’Amajyaruguru MUGABOWAGAHUNDE Maurice hamwe n’abagize inama y’umutekano itaguye y’intara arikumwe n’umuyobozi w’Akarere madamu MUKANYIRIGIRA Judith n’abandi bayobozi basuye banagenzura  imishinga itandukanye iri mu mwaka w'imihigo wa 2024-2025 mu karere ka Rulindo hagamijwe kureba aho igeze ishyirwa mu bikorwa.

Abayobozi basuye imishinga itandukanye irimo Ibyumba bitatu by’amashuri  byubatswe kuri EP Buhande n' ubutuburiro  bwa Cooperative KOYAKIRU itubura imbuto y'ibirayi  mu kagari ka Gasiza mu murenge wa Bushoki.

Abayobozi banasuye ndetse bagenzura  Gare ya shyorongi bareba aho imirimo yo kubaka iyi gare igeze n’amazu y'ubakiwe abacitse ku icumu rya Jenoside yakorewe abatutsi batishoboye mu murenge wa Shyorongi.

Nyuma yo gusura imishinga Guverineri w'intara y'Amajyaruguru yayoboye inama y'Abakozi b'Akareren'abanyamabanga nshingwabikorwa b'imirenge hagamijwe kugaragaza ibyavuye mu isuzuma ry'imihigo y'intara ryakozwe mu cyumweru gishize.

Guverineri w’intara y’Amajyaruguru MUGABOWAGAHUNDE Maurice yashimye Akarere ka Rulindo aho kageze mu gushyira mu bikorwa imihigo y’umwaka wa 2024-2025 asaba ko ibitaranozwa byakwihutishwa bikarangirana nuku kwezi kwa kamena.