Muri iki gihe uRwanda n’isi yose muri rusange twibuka ku nshuro ya 31 jenoside yakorewe abatutsi mu 1994,Guverineri w’intara y’Amajyaruguru MUGABOWAGAHUNDE Maurice hamwe n’umuyobozi w’Akarere madamu MUKANYIRIGIRA Judith n’abandi bayobozi bifatanyije n’abayobozi ndetse n’abanyeshuri bo mu ishuri rikuru ry’imyuga n’ubumenyi ngiro rya RP TUMBA college  mu gikorwa cyo kwibuka ku nshuro ya 31 jenoside yakorewe abatutsi.

Ni igikorwa cyitabiriwe na Guverineri w’intara y’amajyaruguru MUGABOWAGAHUNDE Maurice ari nawe wari umushyitsi mukuru ndetse n’abandi bayobozi barimo Depite Hon BITUNGURAMYE Diogene , Intumwa ya MINUBUMWE, abagize komite nyobozi y’Akarere n’abakuriye inzego z’umutekano mu karere no mu ntara y’Amajyaruguru ndetse n’umuyobozi wa IBUKA mu karere Madam MUREBWAYIRE Alphonsine.

Iki gikorwa cyabimburiwe no gufata umunota wo kwibuka  no guha icyubahiro abazize jenoside yakorewe abatutsi mu Rwanda ndetse urubyiruko rwiga muri kaminuza ya RP TUMBA college  n’abandi bari bitabiriye iki gikorwa bagezwaho ikiganiro ku mateka ya jenoside cyatanzwe na Hon BITUNGURAMYE Diogene  abagaragariza uburyo jenoside  yateguwe ikanashyirwa mu bikorwa n’uburyo abasize bayikoze bagerageza kuyipfobya no kuyihakana kandi bagakomeza gukwirakwiza ingengabitekerezo yayo.

Umuyobozi wa IBUKA mu karere ka Rulindo madamu MUREBWAYIRE Alphonsine yashimiye ingabo zahoze ari iza RPA inkotanyi n’umukuru w’igihugu Nyakubahwa Paul KAGAME bahagaritse jenoside ndetse bagasubiza ubuzima abarokotse jenoside mu gihe bibwiraga ko batakibayeho.

Madamu MUREBWAYIRE kandi yanishimiye ubuyobozi bw’Akarere ka Rulindo budahwema kuba hafi abarokotse jenoside yakorewe abatutsi 1994 haba mukubungabunga ibimenyetso bya jenoside ndetse no kwita byumwihariko kubayirokotse.

Guverinire w’intara y’Amajyaruguru MUGABOWAGAHUNDE Maurice akaba yashimiye ubuyobozi bw’iri shuri rya RP Tumba college  ryateguye iki gikorwa cyo kwibuka ku nshuro ya 31 jenoside yakorewe abatutsi mu kigo cy’ishuri,akaba yabwiye urubyiruko rwiga muri iyi kaminuza ko arirwo mbaraga z’igihugu kandi ko aribo bakwiye guharanira ko ibyabaye mu Rwanda bitazongera kuba ukundi ndetse yibukije urubyiruko ko  rufite amahirwe yo kugira igihugu kiza kandi gifite abayobozi beza ari umwanya wabo wo kuyabyaza umusaruro.

Guverineri kandi yasabye uru rubyiruko kwirinda ingengabitekerezo ya jenoside n’amacukubiri bagakomera kubumwe bw’abanyarwanda ndetse abasaba kwitabira ibikorwa byo kwibuka muri iyi minsi 100 yo kwibuka ku nshuro ya 31 jenoside yakorewe abatutsi mu Rwanda no gushyira imbaraga muri club z’ubumwe n’ubudaheranwa.