Mu mirenge yose igize Akarere ka Rulindo hakozwe ibikorwa by'umuganda rusange, abaturage bishakamo ibisubizo ku bibazo bobangamiye imibereho myiza y’abaturage n’iterambere, byagaragaraga iwabo mu midugudu. Ibi bikorwa by’umuganda rusange byibanze ku gucukura no gusibura imirwanyasuri, guhanga no gusana imihanda n'ibiraro no kubakira abatishoboye.

Umuyobozi w'Akarere wungirije ushinzwe ubukungu Bwana RUGERINYANGE Theoneste ari kumwe n’inzego z’umutekano zikorera mu Karere; yifatanyije n'abaturage b'imirenge ya Base na Cyungo, mu bikorwa byo gusubiranya igishanga cya Gatovu giherereye mu Kagari ka Cyohoha, mu Murenge wa Base, cyangijwe n'ibikorwa by'ubucukuzi bw'amabuye y'agaciro bwakorewe muri icyo gishanga mu buryo butemewe.

Umuyobozi w'Akarere wungirije ushinzwe imibereho myiza Bwana MUTAGANDA Theophile yifatanyije n'abaturage b'Umurenge wa Murambi, mu muganda wakorewe mu Kagari ka Bubangu mu bikorwa byo kurwanya isuri, akaba yari kumwe n'intumwa za RBC ziyobowe na Madamu TWAHIRWA Marie Solange.

Nyuma y'umuganda, abaturage bahawe ubutumwa bubakangurira kwirinda ubucukuzi bw'amabuye y'agaciro butemewe, bibutswa itegeko rigena ibihano ku bakora ubwo bucukuzi butemewe; bakanguriwe kandi kwitabira ibikorwa by'icyumweru cy'irangamimerere, bandikisha abana batanditse, bagasibisha abapfuye batandukuwe; imiryango ibana idasezeranyw ikihutira gusezerana, ....

Abaturage bahawe ubutumwa bubakangurira kubungabunga ibidukikije; kwirinda indwara y'ubushita bw'inkende, bakaraba intoki kenshi, birinda gusuhuzanya bahana ibiganza, gukoranaho, kwirinda kwegerana n’abayirwaye,… Bibukijwe kwizigamira muri Ejo heza, kuko bibafasha gutegura amasaziro meza. Hatnzwe kandi ubutumwa bujyanye no kwitegura igihembwe cy'ihinga 2025 A; abahinzi bose biyandikisha muri Smart Nkunganire, kugira ngo bazabone ifumbire, guhinga ubutaka bwose no gutegura ifumbire y'imborera; basabwe kwirinda ibiza; kubungabunga umutekano, kwirinda amakimbirane, kurwanya ibiyobyabwenge n'ibindi bihungabanya umutekano. Ababyeyi basabwe kwitegura itangira ry'amashuri ku itariki ya 09/09/2024.

Umuganda wagenze neza.