Mu mirenge yose igize Akarere ka Rulindo,  ku wa 27 Nyakanga 2024, hakozwe ibikorwa by’umuganda rusange byibanze ku guhanga imihanda kuri site z’imiturire, gusana imihanda yangiritse mu bihe by’imvura, gutunganya inzira z’amazi ku mihanda, gusana amateme n’ibiraro no kubakira abaturage bafite amikoro make badafite amacumbi. Ku rwego rw'Akarere umuganda wakorewe mu Murenge wa Ngoma, ahakozwe ibikorwa byo gutunganya site y’imiturire ya Mugote, hahangwa  imihanda, ni umuganda Akarere ka Rulindo kifatanyijemo n'abanyeshuri bo mu Ishuri rya George Mason University ryo muri Amerika;  baje kureba Politiki y'Umuganda nk'imwe muri gahunda zo kwishakamo ibisubizo igihugu cyahisemo.

Umuyobozi w’Akarere Madamu MUKANYIRIGIRA Judith ari kumwe n’Umuyobozi w’Akarere wungirije ushinzwe ubukungu bifatanyije n’abaturage b’umurenge wa Ngoma, mu gihe Umuyobozi w’Akarere wungirije ushinzwe imibereho myiza Bwana MUTAGANDA Theophile yifatanyije n’abaturage b’Umurenge wa Kisaro.

Hanakozwe kandi umuganda ushingiye ku bumenyi, aho ku buftanye n'abaforomo hirya no hino mu mirenge, abitabiriye umuganda bapimwe indwara zitandura, zirimo umuvuduko w’amaraso na diyabete; bagirwa n’inama z’uko abatarwaye bakomeza kuzirinda, abarwaye nabo bagafashwa kubana nazo bakurikiza inama z’abaganga.

Umuyobozi w'Akarere wungirije ushinzwe imibereho myiza Bwana MUTAGANDA Theophile yifatanyije n'abaturage b'Umurenge wa Kisaro, Akagari ka Kigarama, mu bikorwa byo kubakira umuturage ufite amikoro make, udafite icumbi.

Nyuma y'umuganda abaturage bahawe ubutumwa bubakangurira gukora bakivana mu bukene, bakiteza imbere, bakirinda guhora bakeneye guhabwa ubufasha. Abitabiriye umuganda kandi bakanguriwe kwirinda icuruzwa ry'abantu no gukoresha ibiyobyabwenge; basabwe gutangira amakuru ku gihe, igihe babonye ahakekwa icuruzwa ry’abantu cyangwa ibiyobyabwenge.

Abaturage basabwe kwimakaza isuku, haba aku mubiri, aho batuye n’aho bakorera; basabwe gutanga umusanzu wa mitiweli ku gihe; baganirijwe kandi ku myiteguro yo Kwizihiza Umunsi w'Umuganura uzizihizwa ku itariki ya 02/08/2024. Ababyeyi bafite abana biga amashuri abanza basabwe kohereza ku ishuri abana barebwa na gahunda nzamurabushobozi, bagahabwa amasomo bagenewe muri iki gihe cy’ibiruhuko.

Umuganda usoza ukwezi kwa Nyakanga 2024 witabiriwe ku buryo bushimishije.