Kuri uyu wa 13 Mata 2022, mu Karere ka Rulindo, mu Rwibutso rwa Jenoside yakorewe Abatutsi rwa Rusiga ruhererereye mu Murenge wa Rusiga hashyinguwe mu cyubahiro imibiri 2 y’abazize Jenoside yakorewe Abatutsi, babonetse mu Murenge wa Shyorongi. Twifatanyije na Nyakubahwa Guverineri w’Intara y’Amajyaruguru Madame Nyirarugero Dancille n’abayobozi b’inzego z’Umutekano mu Ntara y’Amajyaruguru hamwe na Honorable Depite Bitunguramye Diogène.

Guverineri w'Intara y'Amajyaruguru, ari na we wari Umushyitsi Mukuru,  yihanganishije Abarokotse Jenoside yakorewe Abatutsi ku butwari bubaranga mu gutanga imbabazi ku babahemukiye, mu kudaheranwa n’agahinda bagakora bakiteza imbere. Yashimiye ingabo zari iza RPA zahagaritse Jenoside ku bwitange n’ubutwari budasanzwe bwuzuye urukundo bwabaranze, ndetse bamwe muri bo bakahasiga ubuzima, abandi bakahamugarira bagira ngo barokore Abatutsi bicwaga Guverineri yasabye abafite amakuru ku hantu haba hari imibiri itarashyingurwa kuyatanga nayo igashyingurwa mu cyubahiro ikwiye Yasabye buri Munyarwanda kwamagana abagihembera  ingengabitekerezo ya Jenoside, abapfobya Jenoside, abayihakana n'abashaka gusenya ibyagezweho. Yasabye by’umwihariko urubyiruko ndetse n’Abanyarwanda muri rusange, gukoresha imbuga nkoranyambaga mu kunyomoza abashaka kugoreka amateka y’u Rwanda bashaka kuyavuga uko atari no guhembera ingengabitekerezo ya jenoside.

Mu ijambo rye, Umuyobozi w’Akarere ka Rulindo, Madame MUKANYIRIGIRA Judith, yihanganishije imiryango yabuze ababo muri Jenoside yakorewe Abatutsi abasaba kudaheranwa n’agahinda, bakibuka biyubaka. Yasabye Abanyarwanda bose kuba hafi abarokotse Jenoside, kubafata mu mugongo, by’umwihariko muri iyi minsi ijana yo kwibuka, ariko bikaba igikorwa gihoraho no mu yindi minsi.

Mu kiganiro "Twahisemo kuba Umwe" Honorable Depite Bitunguramye Diogene yatanze, yasobanuye ko Jenoside yahungabanyije ubukungu bw'igihugu, ihungabanya ubumwe bw'Abanyarwanda, himakazwa urwango, amoko ahabwa intebe, abitwaga Abatutsi baratotezwa, bahezwa mu mashuri no mu mirimo, barahigwa bicwa gahoro gahoro, Jenoside irategurwa, mu 1994 irakorwa, inzirakarengane zicwa urw'agashinyaguro. Yasobanuye ko n’ubwo Jenoside yahekuye u Rwanda, igasenya ubumwe bw’Abanyarwanda, Abanyarwanda bataheranywe na politiki mbi, ahubwoko bongeye kubaka ubumwe bahoranye, bakaba bari mu rugamba rwo guteza imbere igihugu, asaba Abanyarwanda gufatana urunana mu kubungabunga ubumwe n’umutekano w’igihugu cyacu.

Mu ijambo rye, Perezida wa IBUKA mu Karere ka Rulindo, Madamu Murebwayire Alphonsine,  yagaragaje uburyo Abatutsi bo  Krere ka Rulindo batotejwe ndetse bakagenda bicwa na mbere ya Jenoside yakorewe Abatutsi mu Rwanda mu 1994, cyane cyane mu cyahoze ari Komini Mbogo.

Madamu Murebwayire yashimiye Nyakubahwa Perezida wa Repubulika Paul Kagame n'Ingabo zahoze ari iza RPA kuba zararokoye Abacitse ku icumu rya Jenoside no kuba barabashubije ubuzima. Yashimiye kandi Ubuyobozi bw'Akarere ka Rulindo uburyo buhora hafi abarokotse jenoside mu rugendo rwo kwiyubaka. Aasaba ubufatanye mu kunyomoza abashaka kugoreka amateka ya Jenoside bahembera ingengabitekerezo yayo.

Mu Rwibutso rwa Jenoside rwa Rusiga hashyinguwe mu cyubahiro imibiri ibiri y'inzirakarengane zishwe muri Jenoside, yabonetse mu Murenge wa Shyorongi.

Kugeza ubu mu Rwibutso rwa Jenoside rwa Rusiga hashyinguye imibiri 6,414 y’abashishwe muri Jenoside yakorewe Abatutsi mu Rwanda. Mu karere ka Rulindo hari inzibutso 9 zishyinguyemo imibiri 19,139 y’abazizi Jenoside yakorewe Abatutsi mu Rwanda.