Isibo ni izingiro ry’iterambera imibereho myiza n’imiyoborere myiza by’igihugu umuyobozi w’Akarere ka Rulindo Madam MUKANYIRIGIRA Judith akaba yatangije gahunda yiswe DUHURIRE MU ISIBO igamije gushyira umuturage ku isonga.

Muri iyi gahunda abakozi b’Akarere bose kuva ku rwego rw’umurenge kugera ku bayobozi b’Akarere ndetse n’abakozi muzindi  nzego zikorera mu Karere ka Rulindo buri wese yahawe isibo agomba gukurikirana akamenya amakuru y’imibereho y’abagize isibo 

Byumwihariko mu karere ka Rulindo iyi gahunda yahawe izina Abadahigwa mu isibo bijyanye n’izina ry’ubutore ry’Akarere ka Rulindo ry’ABADAHIGWA,muri iyi gahunda hazakusanywa amakuru ku mibereho y’Abagize isibo ahari ibibazo bafatanye kubishakira ibisubizo ndetse hanarebwa amahirwe ahari kugirango abaturage babashe kuyabyaza umusaruro.

Nyuma yo gutangiza ku mugaragaro iyi gahunda umuyobozi w’Akarere madam MUKANYIRIGIRA Judith yahise akomereza mu isibo yitwa TWIHESHE AGACIRO yo mu mudugudu wa batimba akagali ka Bugaragara mu murenge wa Shyorongi, umuyobozi w’Akarere akaba yasuye urugo ku rundi areba imibereho y’Abatuye mw’isibo yibanda cyane ku kureba isuku uturima tw’igikoni,ubwisungane mu kwivuza ndetse n’uburyo abana bitabira ishuri.

Umuyobozi w’Akarere nyuma yo kureba imibereho yabagize  isibo ya TWIHESHE AGACIRO yaganirije abatuye isibo abagaragariza ko kuba bafite igishanga cyo guhingamo imboga zitandukanye kandi bakaba  batuye hafi y’umujyi wa Kigali ari amahirwe bakwiye kuba babyaza umusaruro kuko bizabafasha kubona aho bagurisha imboga bagakirigita ifaranga.

Akarere ka Rulindo kagizwe n’amasibo 4082 mur’iyi gahunda y’Abadahigwa mu isibo buri isibo yose ikaba ifite umuntu uyishinzwe ugomba gukurikirana hagamijwe gushyira umuturage ku isonga.