Kuri uyu wa kabiri mu karere ka Rulindo hatangijwe icyumweru cyahariwe kwimakaza ihame ry’uburinganire, Gender Accountability Dialogue (GAD),ni ubukangurambaga bufite insanganyamatsiko igira iti:“Umuryango utekanye, Ishema Ryanjye” ubu bukangurambaga bukaba bwatangirijwe mu nteko y’abaturage yabereye mu murenge wa Burega.

Atangiza ubu bukangurambaga umuyobozi w'Akarere wungirije ushinzwe iterambere ry'Ubukungu RUGERINYANGE Theoneste yasabye abaturage kwitabira ibikorwa biteganyije muri iki cyumweru birimo:Gusezeranya imiryango ibana itarasezeranye mu mategeko, Kuganiriza imiryango ibana mu makimbirane, Kwandika abana batanditse mu irangamimerere,Kuganiriza abangavu basambanyijwe, Kugarura mu ishuri abana bataye ishuri.

RUGERINYANGE Theoneste yakomeje asobanurira abaturage  intego y'ubu bukangurambaga agaragaza ko bugamije  gukomeza kwimakaza Ihame ry’uburinganire n’ubwuzuzanye hagati y’abagore n’abagabo.Yagize ati: “Umuryango utekanye niwo musingi w’iterambere ry’igihugu Ni umwanya rero mwiza wo gusuzuma aho tugeze mu gukemura ibibazo bibangamiye umuryango, tunafatira hamwe ingamba zo gukemura ibibazo bikibangamiye Umuryango nyarwanda aho bikigaragara.”

ubu bukangurambaga biteganyijwe ko buzasozwa tariki ya 2 ukwakira 2025, Ubushakashatsi butandukanye mu Rwanda bugaragaza ko hari intambwe nziza imaze guterwa mu kwimakaza ihame ry’uburinganire, ariko ko  hakiri imbogamizi zikomeye zishingiye ku myumvire n'imico n'ikibazo cy'ihohoterwa rishingiye ku gitsina n'izindi...