Kuri uyu wa 07 Mata 2022, mu Karere ka Rulindo, kimwe n’ahandi mu gihugu, hatangijwe icyumweru cy’icyunamo no kwibuka ku nshuro ya 28 Jenoside yakorewe Abatutsi mu Rwanda mu 1994, ibikorwa byo gutangiza icyumweru cy'icyunamo  byabereye mu midugudu, ku rwego rw'Akarere byabereye ku Rwibutso rwa Jenoside rwa Mvuzo mu Murenge wa Murambi, twifatanyije na Nyakubahwa Guverineri w’Intara y’Amajyaruguru Madame Nyirarugero Dancille n’abayobozi b’inzego z’Umutekano mu Ntara y’Amajyaruguru, Honorable Depite Mukayijore Suzanne, Umuyobozi w'urugaga rw'Abikorera mu Ntara y'Amajyaruguru Madame Mukanyarwaya Donatha, Umuyobozi w'Inama Njyanama y'Akarere ka Rulindo Bwana Dusabirane Aimable, Perezidante w'umuryango Ibuka mu Karere Madame Murebwayire Alphonsine, Perezidante wa AVEGA Madame Annonciate MUKABARANGA, Umuyobozi w'ihuriro ry'abafatanyabikorwa mu Karere ka Rulindo Padiri Augustin Nzabonimana abayobozi mu b'ibigo bikorera mu Karere n'abaturage b'Umudugudu wa Rurama, Akagari ka Mvuzo.

Ibikorwa byo gutangiza icyumweru cy’icyunamo byabimburiwe no kwenyegeza urumuri rw’icyizere, bikomereza ku Rwibutso rwa Jenoside rwa Mvuzo, mu Murenge wa Murambi.

Mu ijambo rye, Umuyobozi w’Akarere ka Rulindo, Madame MUKANYIRIGIRA Judith, yihanganishije imiryango yabuze ababo muri Jenoside yakorewe Abatutsi abasaba kudaheranwa n’agahinda, bakibuka biyubaka. Yagize ati: "Abahungabana si amakosa yabo ahubwo ni uko bahuye n'ibiremereye." Yasabye Abanyarwanda bose kuba hafi abarokotse Jenoside, kubafata mu mugongo muri ibi bihe byo kwibuka no gufatana urunana mu kubungabunga umutekano Jenoside ntizasubire ukundi.

Mu kiganiro "Twahisemo kuba Umwe" Habiyaremye Oswald watanze ikiganiro, yasobanuye ko Jenoside yahungabanyije ubukungu bw'igihugu, ihungabanya ubumwe bw'Abanyarwanda, himakazwa urwango, amoko ahabwa intebe, abitwaga Abatutsi baratotezwa, bahezwa mumashuri no mu mirimo, barahigwa bicwa gahoro gahoro, Jenoside irategurwa, mu 1994 irakorwa, inzirakarengane zicwa urw'agashinyaguro. Yasobanuye ko n’ubwo Jenoside yahekuye u Rwanda, igasenya ubumwe bw’Abanyarwanda, Abanyarwanda bataheranywe na politiki mbi, ahubwoko bongeye kubaka ubumwe bahoranye, bakaba bari mu rugamba rwo guteza imbere Igihugu.

Habiyaremye yagize ati: "Kuba Abanyarwanda twarahisemo kuba umwe nyuma ya Jenoside si intege nke, ahubwo ni uko ariwo muti urambye, tube umwe dutahirize umugozi umwe twubake u Rwanda rwacu, dukore twiteze imbere."

Mu ijambo rye, Perezidante wa IBUKA mu Karere ka Rulindo, Madamu Murebwayire Alphonsine,  yagaragaje uburyo Abatutsi bo  Krere ka Rulindo batotejwe ndetse bakagenda bicwa na mbere ya Jenoside yakorewe Abatutsi mu Rwanda mu 1994, cyane cyane mu cyahoze ari Komini Mbogo.

Madamu Murebwayire yashimiye Nyakubahwa Perezida wa Repubulika Paul Kagame n'Ingabo zahoze ari iza RPA kuba zararokoye Abacitse ku icumu rya Jenoside no kuba barabashubije ubuzima. Yashimiye kandi Ubuyobozi bw'Akarere ka Rulindo uburyo buhora hafi abarokotse jenoside mu rugendo rwo kwiyubaka. Aasaba ubufatanye mu kunyomoza abashaka kugoreka amateka ya Jenoside bahembera ingengabitekerezo yayo.

Guverineri w'Intara y'Amajyaruguru, ari na we wari Umushyitsi Mukuru,  yihanganishije Abarokotse Jenoside yakorewe Abatutsi ku butwari bubaranga mu gutanga imbabazi ku babahemukiye, mu kudaheranwa n’agahinda bagakora bakiteza imbere. Yashimiye ingabo zari iza RPA zahagaritse Jenoside ku bwitange n’ubutwari budasanzwe bwuzuye urukundo bwabaranze, ndetse bamwe muri bo bakahasiga ubuzima, abandi bakahamugarira bagira ngo barokore Abatutsi bicwaga Guverineri yasabye abafite amakuru ku hantu haba hari imibiri itarashyingurwa kuyatanga nayo igashyingurwa mu cyubahiro ikwiye Yasabye buri Munyarwanda kwamagana abagihembera  ingengabitekerezo ya Jenoside, abapfobya Jenoside, abayihakana n'abashaka gusenya ibyagezweho.

Guverineri yasabye kandi abturage kuba hafi abarokotse Jenoside, kubasura, kubafata mu mugongo no kubereka urukundo rw'ukuri iminsi yose Atari mu gihe cy’icyunamo gusa no kubungabunga inzibutso za Jenoside ku buryo buhoraho. Guverineri w'Intara y'Amajyaruguru yijeje Abarokotse Jenoside ko Leta y'u Rwanda izakomeza kubaba hafi no kwita ku mibereho yabo umunsi ku wundi.

Mu Rwibutso rwa Jenoside rwa Mvuzo hashyinguwe mu cyubahiro imibiri itatu y'inzirakarengane zishwe muri Jenoside, yimuwe aho yari ishyinguye mu Kgari ka Bubangu mu Murenge wa Murambi.

Kugeza ubu muri Rwibutso rwa Jenoside rwa Mvuzo hashyinguyemo imibiri y'inzirakarengane zishwe muri Jenoside yakorewe Abatutsi mu Rwanda, ibihumbi 6,703.