Kuri uyu wa 23/10/2020 mu Murenge wa Masoro, Akagari ka Nyamyumba, ku rwego rw'Akarere ka Rulindo hatangijwe igihembwe cy'amashyamba 2020/2021, hazirikanwa insanganyamatsiko igira iti: "Amashyamba, umusingi w'imibereho myiza y'abaturage n'iterambere rirambye."

Igikorwa cyo gutera ibiti cyabereye muri zone yacukuwemo amabuye y'agaciro na Rutongo Mines Ltd, gitangizwa n'umuganda wo gutera ishyamba wahuje abaturage bo mu Kagali ka Nyamyumba, haterwa ibiti ku buso bungana na 1Ha. Bikaba biteganyijwe ko iki gikorwa kikazakomeza haterwa amashyamba ku buso bwa ha 20 kuri sites za Nyamyumba na Gasambya naho hagiye hacukurwa amabuye y'agaciro, hakaba hakenewe kubungwabungwa haterwa ishyamba, nyuma yo gusubiranya imyobo iba yacukuwemo amabuye y’agaciro.

Iki gikorwa kitabiriwe n'umuyobozi w'Akarere ka Rulindo wungirije ushinzwe iterambere ry'Ubukungu Bwana MULINDWA Prosper, umuyobozi wa Kompanyi icukura amabuye y’agaciro muri iyo misozi ariyo Rutongo Mines Ltd Bwana Kevin Buyskes, Umunyamabanga Nshingwabikorwa w'Umurenge wa Masoro Bwana UWAMAHORO Telesphore,

Ushinzwe amashyamba mu Karere ka Rulindo Madame Salama Fides, Ushinzwe ibidukikije mu Karere ka Rulindo Bwana HACINEZA Eugene hamwe n’abaturage bo mu Murenge wa Masoro.

Nyuma y'umuganda abaturage bakanguriwe gukomeza kwita ku mashyamba no ku bidukikije muri rusange, birinda gusarura amashyamba ateze kandi n’iyo yaba yeze bakabisabira uburenganzira. Abaturage bibukijwe ko amashyamba atagomba kononwa batema imishoro cyangwa amakumba byo gusakaza amazu, ahubwo ko bagomba gukoresha imbaho cyangwa ibyuma kugira ngo amashyamba akure neza, kuko byagaragaye ko mu gihugu cyacu dufite iicyuho mu bijyanye n’amashyamba, bityo bikaba biteza ingaruka zijyanye n’imihindagurikire y’ikirere.

Abitabiriye umuganda bibukijwe ko muri ibi bihe by’imvura ndetse n’igihe bubatse inzu bagomba  kuzirika ibisenge by'amazu mu rwego rwo kwirinda Ibiza bibatwara ibisenge by’amazu bagatakaza byinshi kandi bari kuba baririnze. Basabwe kandi gukomeza kwitabira gahunda da Ejo Heza, bazigamira izabukuru. Bibukijwe gutegura abana itangira ry'amashuri no gukomeza gushyira mu bikorwa ingamba zo kwirinda COVID19 kuko ntaho yagiye kandi ikaba itarabonerwa umuti n’urukingo.

No mu yindi Mirenge igize Akarere uko ari 17 habaye igikorwa cyo gutangiza igihembwe cy'amashyamba 2020/2021, abaturage basabwa gukomeza gutera ibiti kandi bakibuka no gutera ibiti by’imbuto ziribwa kuko bifasha mu kurwanya imirire mibi mu bana no mu bakuze.