Kuri uyu wa kabiri mu karere ka Rulindo hatangijwe ku mugaragaro gahunda yiswe “Bandebereho” izafasha mu mibereho myiza y’abagize umuryango. Iyi gahunda yatangijwe na Minisitiri w’Uburinganire n’Iterambere ry’Umuryango, Madamu Uwimana Consolée, hamwe n’Umuyobozi w’Akarere wungirije ushinzwe Imibereho Myiza y’Abaturage, Mutaganda Théophile,n’umuyobozi w’Umuryango uharanira iterambere ry’uburinganire n’ubwuzuzanye hagati y’umugabo n’umugore RWAMREC.

Iyi gahunda igamije gushishikariza abagabo kugira uruhare rugaragara mu kwita ku buzima bw’umwana n’umubyeyi, kurwanya ihohoterwa rikorerwa mu muryango, no kubaka umubano mwiza ushingiye ku bwumvikane, ubufatanye n’ubwuzuzanye hagati y’abagize umuryango.

Mu ijambo rye, Minisitiri w’Uburinganire n’Iterambere ry’Umuryango,UWIMANA Consolée, yavuze ko gahunda ya Bandebereho izagira uruhare rukomeye mu gukemura ibibazo bitandukanye bikibangamiye iterambere ry’imiryango n’imibereho myiza yawo, birimo igwingira, amakimbirane yo mu ngo, ubusinzi, ihohoterwa rikorerwa abana ndetse n’ibindi bibazo bishobora guhungabanya iterambere ry’umuryango.

Yashimangiye ko uruhare rw’umugabo mu buzima bw’umuryango ari ingenzi cyane, cyane  mu kwita ku buzima bw’umubyeyi n’umwana, no guteza imbere umuco w’ubwubahane n’ubwuzuzanye hagati y’abashakanye.

Gahunda ya Bandebereho izashyirwa mu bikorwa mu gihe cy’imyaka itatu, ku bufatanye n’Umuryango RWAMUREC, usanzwe uharanira guteza imbere ihame ry’uburinganire n’ubwuzuzanye hagati y’abagabo n’abagore.

Abitabiriye iki gikorwa bagaragaje ko iyi gahunda izafasha kongera ubukangurambaga bugamije kubaka umiryango ushoboye kandi utekanye, urangwa n’ubumwe, urukundo n’iterambere rirambye,ugira uruhare mu kubaka umuryango utarangwamo ihohoterwa.

Binyuze muri iyi gahunda, abahagarariye ibyiciro bitandukanye  basabwe kugira uruhare rugaragara mu bikorwa byose bizakorwa hagamijwe guteza imbere imibereho myiza y’umuryango no kurandura ibibazo bibangamiye Umuryango