Kuva kuri uyu wa gatatu mu karere ka Rulindo hatangiye imurikabikorwa ry’abafatanyabikorwa b’Akarere ka Rulindo ku nsanganyamatsiko igira iti: “Ubufatanye mu Kwigira turinda ibyagezweho.” 

Iri murikabikorwa ryafunguwe ku mugaragaro na Guverineri w’intara y’Amajyaruguru MUGABOWAGAHUNDE Maurice hamwe n’umuyobozi w’Akarere madamu MUKANYIRIGIRA Judith,visi perezida w’inama Njyanama y’Akarere n’abandi bayobozi batandukanye n’abakuriye izego z’umutekano mu karere n’abafatanyabikorwa batandukanye.

Iri murikabikorwa riri kubera mu murenge wa Base ahazwi nko mu gakiriro  rikazamara iminsi itatu, abafatanyabikorwa mu iterambere ry’Akarere bamurika ibikorwa byabo.

Abitabiriye imurikabikorwa basobanuriye Guverineri n’abandi bayobozi ibyo bakora banabagaragariza uruhare rwabo mu iterambere ry’Akarere.

Umuyobozi w’Akarere MUKANYIRIGIRA Judith ashimira abafatanyabikorwa uruhare bagira mu iterambere kuko bakora ku nkingi zose haba iyubukungu,imibereho myiza y’abaturage ndetse n’inkingi y’imiyoborere ndetse akaba yashimye n’uruhare bagize bagize mu gutegura iri murikabikorwa.\

Uhagarariye abafatanyabikorwa Mu Karere ka Rulindo RUKUNDO Jean Pierre akaba n’umuyobozi wa Health Builders yagarutse ku nsanganyamatsiko y’imurikabikorwa ry’uyu mwaka ashimangira ko ubufatanye hagati y’abaturage,abikorera ndetse n’ubuyobozi ariyo nshingiro yo kwigira.

Guverineri w’intara y’Amajyaruguru MUGABOWAGAHUNDE Maurice yashimiye abafatanyabikorwa b’Akarere ka Rulindo bitabiriye imurikabikorwa ry’uyu mwaka n’uruhare rwabo mu iterambere ry’Akarere ndetse anashima urubyiruko rwitabiriye imurikabikorwa rukaza kumurika ibikorwa byarwo, asaba abaturage b’Akarere ka Rulindo kwitabira iri murikabikorwa bakaza kureba ibikorwa birimo na serivise ziri gutangirwamo.

Iri murikabikorwa ry’Akarere ka Rulindo ryitabiriwe n’abafatanyabikorwa barenga 1000 rikaba rizasozwa tariki ya 13 /6 /2025.