Ku wa 08/03/2022, mu Karere ka Rulindo hizihijwe Umunsi Mpuzamahanga w'Umugore. Ni igikorwa cyitabiriwe n'Umuyobozi w'Akarere Madame MUKANYIRIGIRA Judith, Abadepite mu Nteko Ishinga amategeko y'u Rwanda ari bo Hon. Deputé Uwingabe Solange na Hon. Deputé Habiyaremye Pierre Céléstin, abagize inama y'umutekano itaguye y'Akarere, Abajyamama mu Nama Njyanama y'Akarere, Umuyobozi w'Akarere wungirije ushinzwe iterambere ry'Ubukungu Bwana MUTSINZI Antoine n'abandi bafatanyabikorwa batandukanye.

Ibikorwa byaranzwe no gutaha icyumba cy'umukobwa cyubatswe kuri GS Shyorongi, ku nkunga ya ETI Nyakabingo, inyubako n'ibikoresho bifite agaciro ka miliyoni 75 z’amafaranga y’u Rwanda. Ku bufatanye n’ihuriro ry'abanyarwandakazi bafite ubumuga bwo kutumva no kutavuga, abanyeshuri b'abakobwa biga muri GS Rukingu, mu Murenge wa Rusiga, bashyikirijwe cotex 250, imiryango 2 iyobowe n’abagore yahawe ibigega bya metero cube 5. Mu mirenge hirya no hino Abagore borojwe inka n’andi matungo magufi, hagamijwe kongerera ubushobozi umugore.

Ubutumwa bwatanzwe bwashishikarizaga abaturage by'umwihariko abagore, kurwanya ibiza bahangana n'ingaruka z'ibihe. Abagore basabwe kwitinyuka no guharanira kubaka ubushobozi babishyigikiwemo n'abagabo. Abaturage muri rusange basabwe kurwanya igwingira ry'abana no kurwanya ihohoterwa, baharanira kubaka umuryango utekanye kandi ushoboye.

Depite Uwingabe Solange, uru mu Ihuriro Nyarwanda ry’abagore bari mu Nteko Ishinga amategeko, yibukije Abanyarwanda ko nta terembere Igihugu cyangwa Isi byageraho umugore atabigizemo uruhare, abasaba guhora barengera ubwuzuzanye n’uburinganire kandi barengera n’ibidukikije.

Yagize ati “Uyu ni umwanya wo kuzirikana uruhare umugore agira mu iterambere ry’igihugu n’Isi muri rusange kuko atabigizemo uruhare ntibyagerwaho. Icyo nk’Abanyarwanda dukwiye kuba dukora ni uguharanira kugera ku bwuzuzanye n’uburinganire byuzuye, ibi kandi nabyo ntitwabigeraho tutarengera ibidukikije kuko natwe turimo, twirinde ibyangiza ikirere, dufate neza ubutaka, amashyamba n’undi mutungo kamere bireke kwangirika."

Umuyobozi w’Akarere ka Rulindo, Mukanyirigira Judith, yavuze ko nk’Akarere gakunze kwibasirwa n’ibiza, icyo bashyize imbere ari ugushishikariza abagore kurushaho gusobanukirwa ibyo bakwiye kuba bakora ngo nabo bagire uruhare mu kurushaho kugabanya izo ngaruka ariko banafasha imwe mu miryango itishoboye.

Yagize ati" Birumvikana hari inshingano utakura ku mugore nko kubyara no kurera, ibi kandi agomba no kubihuza no gushaka n’iterambere ry’urugo, niyo mpamvu dufatanya n’abafatanyabikorwa tukabafasha kugabanya umwanya batakazaga bajya gushaka amazi bagahabwa ibigega, bagahabwa gaz na rondereza ngo bagabanye igihe bakoreshaga babishaka bakangiza n’ibidukikije."

Yavuze ko iki cyumba cy’umukobwa kizafasha aba bana mu gihe bari kwezi kwabo bitumen badatakaza umwanya.

Ati "Tugatanga iki cyumba cy’umukobwa ngo yoroherezwe mu gihe ari mu kwezi kwe bitume adata umwanya byamuviragamo no kuba yata ishuri bityo bige baharanire n’iterambere. Turabashishikariza kurushaho guhanga n’ingaruka z’imihindagurikire y’ibihe abagore bakabigiramo uruhare abifite bakifasha naho abadafite ubushobozi natwe nka Leta n’abafatanyabikorwa tuzakomeza kubafasha uko tuzabishobora."

Bamwe mu bagore bafashijwe, bishimiye ubufasha bahawe bizeza ababafashije ko nabo bagiye kubuheraho bakiteza imbere.

Ndikumana Daphrose wahawe inka, yagize ati" Nta nka nagiraga, naburaga ifumbire n’amata, ubu iyi ngiye kuyitaho inteze imbere haba mu buhinzi n’ubworozi kandi izajya impa n’udufaranga yabyaye kandi tuzanywa n’amata. Ndashimira Perezida wacu Paul Kagame n’aba bana bankue mu bukene."

Mukundente Aiba, we ni umunyeshuri ku Rwunge rw’Amashuri rwa Shyorongi, rwahawe icyumba cy’umukobwa. Yavuze ko kuba ishuri ryabo ritari rifite icyumba nk’iki cyagutse byabagiragaho ingaruka zitandukanye.

Yagize ati “Twari dufite icyumba gito kidafite n’ibikoresho bihagije. Njye ubwanjye hari igihe nagiyemo nsangamo mugenzi wanjye kandi nari meze nabi, byansabye gutaha njya mu rugo ntakaza amasomo kandi hari na bagenzi banjye byakundaga kubaho. Ubu baduhaye icyumba gihagije, gifite ibikoresho byose n’aho kuruhukira mu gihe bibaye ngombwa, turishimye kuko imbogamizi twagiraga bigatuma tutiga neza zirakemutse."

Umunsi Mpuzamahanga w’umugore mu Karere ka Rulindo wizihijwe, abagore bashyigikirwa mu iterambere ryabo bashyikirijwe icyumba cy’umukobwa cyatwaye miliyoni 75Frw, imiryango iyobowe n’abagore 56 yorozwa inka, ibiri ihabwa ibigega binibi bifata amazi indi miryango 27 yorozwa ihene, intama n’ingurube.

Uyu Munsi Mpuzamaganga w’Umugore wari ufite insanganya igira iti " Ubwuzuzanye n’Uburinganire mu guhangana n’imihindagurikire y’ibihe".