Ku wa kabiri tariki ya 04 Ukwakira 2022, hirya no hino mu mirenge igize Akarere ka Rulindo hizihijwe umunsi mpuzamahanga w’abageze mu zabukuru, uyu munsi wari ufite insanganyamatsiko igira iti “Abageze mu zabukuru isôoko tuvomaho.”

Ku rwego rw’Akarere, ibirori byo kwizihiza uyu munsi byabereye mu murenge wa Bushoki, byitabirwa n’ibyiciro byose by’abaturage biganjemo abakuze, bifatanya n’inzego z’umutekano n’Umuyobozi w’Akarere ka Rulindo wungirije ushinzwe imibereho myiza MUTAGANDA Theophile. Umuyobozi w’umurenge wa Bushoki, Nkusi Pontien yavuze ko mu murenge wa Bushoki ufite abaturage bageze mu zabukuru bahabwa ubufasha butandukanye mu rwego rwo kubasindagiza mu masaziro yabo, avuga ko harimo abahabwa inkunga y’ingoboka bagera kuri 182.

Umuyobozi w’Akarere ka Rulindo w’ungirije ushinzwe imibereho myiza y’abaturage, Mutaganda Theophile, yagize ati ”Igihugu cyacu gifite umwihariko ukomeye wo kuzirikana umuryango kuko ariwo shingiro rya byose, niyo mpamvu tugomba kuzirikana ababyeyi tukabasazisha neza, abakiri bato dufite inshingano zo gufasha abage mu zabukuru mu mirimo batagishoboye kwikorera, kandi tukabikorana urukundo; turasabwa kububaha, tukababa hafi, tukabaganiriza, ariko tukanabatega amatwi bakatwigisha kuko bafite ubunararibonye.”

Uyu muyobozi avuga ko mu kwizihiza uyu munsi ugomba kujya ugira icyo usigira urubyiruko nk’inyigisho, mu rwego rwo gusindagiza abageze mu zabukuru, yavuze ko n’ubwo Leta ifasha abageze mu zabukuru, bidakuraho ko umwana aba gomba gushajisha neza ababyeyi be, ndetse n’igihe umuntu akiri muto agategura amasaziro ye yizigamira muri gahunda zitandukanye zirimo nka Ejo Heza ifasha abiteganyirije bakiri bato gusaza bahabwa amafaranga abatunga.

Umuyobozi w’Akarere wungirije ushinzwe imibereho myiza, yibukije abageze mu zabukuru ko n'ubwo bageze mu zabukuru bagomba kwigirira ikizere kandi ko bafitiye igihugu akamaro kanini, bityo ko Ubuyobozi buzakomeza kubaba hafi.

Abaturage bitabiriye ibirori byo kwizihiza umunsi mpuzamahanga w’abageze mu zabukuru, bahawe ubutumwa bubakangurira kugira isuku; kwizigamira muri Ejo Heza; kujyana abana bose mu ishuri no gutanga umusanzu wo gushyigikira gahunda yo gufatira ifunguro rya sa sita ku ishuri; gutanga umusanzu w'ubwisungane mu kwivuza ku baturage batarawutanga no gukomeza kwirinda icyorezo cya Ebola.

Imwe mu miryango y'abageze mu zabukuru yaremewe, ihabwa matelas, ibiringiti, ifu y'igikoma, kawunga n'ibikoresho by'isuku.

Umukecuru Mukaruziga, utuye mu Murenge wa Bushoki, Akagari ka Gasiza, avuga ko uyu munsi ari umunsi w’ibyishimo ku bageze mu zabukuru, kuko bibereka ko ubuyobozi bw’igihugu bubitayeho kandi bubaha agaciro. Yagize ati: “Uyu munsi turanezerewe, abakuru n’abato badushagaye, baradutaramira natwe turamwenyura. Turishimye cyane, kera abantu bageraga mu za bukuru ntabwo bitabwagaho, ariko kuri ubu twaratetetshejwe, duhabwa ka VUP, mbese turashima Perezida Kagame, ni ukuri ntacyo atakoze: amazi hafi, amashanyarazi, amavuriro ndetse ubu abuzukuru bariga hafi, mu gihe cyacu amashuri n’amavuriro byabaga iyo bigwa, ariko ubu iterambere ryaratwegereye. Akarusho rero ubu bampaye matola n’agafu k’igikoma, ndaryama heza ubundi nywe agakoma mererwe neza.”

Mu karere ka Rulindo abageze mu zabukuru bahabwa inkunga y’ingoboka, ibafasha mu kugira amasaziro meza, bagera ku bihumbi bitatu magana atandatu na batatu (3,606).