Kuri uyu wa kane  mu Murenge wa Cyinzuzi hizihirijwe Umunsi wahariwe Ingo Mbonezamikurire y’Abana Bato (ECD Day), ufite insanganyamatsiko igira iti: “Ingo mbonezamikurire y’Abana Bato: Inkingi y’Iterambere ry’Umuryango.”

Kwizihiza uyu munsi byahuriranye no gufungura ku mugaragaro Urugo Mbonezamikurire rw’Ikitegererezo rwubatswe ku bufatanye bw’Akarere ka Rulindo na Food For The Hungry ndetse no gutanga ibyemezo by’ishimwe ku babyeyi bemeye gutanga ingo zabo kugira ngo zikorerewemo gahunda z’ingo mbonezamikurire y’abana bato.

Mu ijambo rye, Umuyobozi w’Akarere yashimye uruhare n’ubwitange by’abaturage ndetse n’abafatanyabikorwa bakomeje gushyigikira gahunda zitandukanye zigamije guteza imbere imibereho myiza y’abana bato. Yagaragaje ko gahunda ya ECD ari imwe mu nkingi z’iterambere rirambye ry’umuryango n’Igihugu muri rusange, kuko ishyira umwana ku isonga kuva akiri muto.

Madamu Mukanyirigira Judith yashimiye by’umwihariko umufatanyabikorwa Food For The Hungry ku ruhare rufatika ukomeje kugira mu guteza imbere ibikorwa bya ECD mu Karere ka Rulindo, cyane cyane mu kubaka no gushyigikira ingo mbonezamikurire z’ikitegererezo. Yavuze ko ubu bufatanye bugira uruhare rukomeye mu kongera umubare w’ibigo n’ingo zifasha abana bato kubona serivisi zibafasha gukura neza haba ku mubiri, mu bwenge no mu mibereho rusange.

Abaturage bitabiriye iki gikorwa bagaragaje ko gahunda y’ingo mbonezamikurire ikomeje kubafasha kurushaho gusobanukirwa uruhare rwabo mu kurera no kwita ku bana bato, banashimira Akarere n’abafatanyabikorwa ku nkunga bakomeje kubagezaho.

Umunsi wahariwe Ingo Mbonezamikurire y’Abana Bato wasize ubutumwa bukomeye bwo gukomeza gushyira imbaraga mu bikorwa biteza imbere uburere, ubuzima n’imikurire myiza y’abana bato, hagamijwe kubaka imiryango ikomeye n’Igihugu gifite ejo hazaza heza.