Ku wa 04 Nyakanga 2022, mu Karere ka Rulindo hizihijwe ku nshuro ya 28 Umunsi wo kwibohora, abaturage bishimira ibikorwa remezo bubakiwe bizabafasha mu iterambere no kuzamura imibereho myiza yabo.

Ibirori byabereye mu Mirenge yose igize Akarere ka Rulindo uko ari 17. Ku rwego rw'Akarere ibirori byabereye mu Murenge wa Kinihira; aho twifatanyije na Nyakubahwa Guverineri w'Intara y'Amajyaruguru Madame Nyirarugero Dancille ari kumwe n'abandi bagize inama y'umutekano itaguye y'Intara y'Amajyaruguru, Nyiricyubahiro Musenyeri wa wa Diyosezi Gatolika ya Byumba Musengamana Papias, Umuyobozi w'Akarere ka Rulindo Madame Mukanyirigira Judith n'abandi bagize inama y'umutekano itaguye y'Akarere, uwahoze ari Umuyobozi w'Akarere ka Rulindo Bwana Kangwagye Justus, abayobozi b'amadini n'amatorero, abafatanyabikorwa batandukanye, incuti za Rulindo n'abaturage b'Umurenge wa Kinihira.

Ibirori byaranzwe no gusura Ubusitani bw'ahasinyiwe Amasezerano y'amahoro ya Kinihira yo ku wa 25/07/1993 hagati ya FPR Inkotanyi na Guverinoma y'u Rwanda; gusura imurikabikorwa (min-exposition) y'ibikorwa by'abaturage by'iterambere, ikiganiro kijyanye no kwibohora cyatanzwe n'Umuyobozi w'Akarere Madame Mukanyirigira Judith ari kumwe na bamwe mu bari mu rugamba rwo kubohora u Rwanda Bwana Kangwagye Justus na Maj. Gen. Eric Murokore.

Bimwe mu bikorwa byishimirwa byubatswe harimo ikigo nderabuzima cya Cyinzuzi kije gufasha ababyeyi n’abandi barwayi bakoraga urugendo rurerure bajya kwivuza mu Kigo nderabuzima cyubatse mu Murenge bahana imbibe wa Ngoma; ikiraro cyo mu kirere kizafasha abanyeshuri, ababyeyi n’abandi baturage b’imirenge ya Ntarabana, Masoro na Cyinzuzi bagorwaga no kwambuka umugezi wa Rusine iyo imvua yabaga yaguye, ukuzura. Hubatswe kandi ikiraro cyo mu kirere gihuza Umurenge wa Rukozo n’Umurenge wa Miyove mu Karere ka Rulindo, iki kiraro kikaba kizafasha abanyeshuri bakomoka mu Murenge wa Rukozo biga kuri GS Miyove, bajyaga bagorwa no kwambuka umugezi wa Gisagayandi wuzuraga mu bihe by’imvura, bakaba banacumbika kubera kubura uko bambuka. Hubatswe Poste de santé 14 zizafasha abaturage kwivuriza hafi badakoze urugendo rurerure, n’ibindi bikorwa bitandukanye.

Ubutumwa bwatanzwe bwagarutse ku butwari, gukunda igihugu no kudacika intege byaranze ingabo zari iza RPA zirangajwe imbere n'uwari Umugaba Mukuru wazo HE Paul Kagame, basaba abakiri bato n'urubyiruko kubafataho urugero no kwishimira ibikorwa by'iterambere byagezweho, kandi bagaharanira guhuza imbaraga bakiteza imbere bahereye ku mahirwe igihugu kibaha.

Abaturage basabwe gukora bakiteza imbere, gusigasira ibyagezweho no kurangwa n'ubufatanye mu kubungabunga umutekano.

Mu Mirenge ibirori yose  byaranzwe no kumurika ibikorwa biteza imbere umuturage byagezweho, imbyino, ubusabane n'imikino y'umupira w'amaguru, hishimirwa ibyagezweho mu iterambere, hazirikanwa insanganyamatsiko igira iti : Kwibohora isooko yo kwigira.