Rulindo: Hizihijwe umunsi wo kwibohora hishimirwa ibikorwa remezo begerejwe

Ku wa 04 Nyakanga 2023, mu Karere ka Rulindo hizihijwe ku nshuro ya 28 Umunsi wo kwibohora, abaturage bishimira ibikorwa remezo bubakiwe bizabafasha mu iterambere no kuzamura imibereho myiza yabo.

Ibirori byabereye mu Mirenge yose igize Akarere ka Rulindo uko ari 17. Ku rwego rw'Akarere ibirori byabereye mu Murenge wa Base; aho twifatanyije na Nyakubahwa Guverineri w'Intara y'Amajyaruguru Madame Nyirarugero Dancille ari kumwe n'abandi bagize inama y'umutekano itaguye y'Intara y'Amajyaruguru, Umuyobozi w'Akarere ka Rulindo Madame Mukanyirigira Judith n'abandi bagize inama y'umutekano itaguye y'Akarere, abayobozi b'amadini n'amatorero, abafatanyabikorwa batandukanye, incuti za Rulindo n'abaturage b'Umurenge wa Base.

Ku itariki ya 04 Nyakanga, ibirori byabimburiwe no gutaha ku mugaragaro isoko n’agakiriro byubatswe mu Murenge wa Base, bitwaye akayabo k’amafaranga y’u Rwanda asaga miliyari ebyiri n’igice. Hamuritswe ibikorwa by’ubuhinzi, ubworozi, ubukorikori n’inganda byagezweho n’abaturage bikabafasha kwiteza imbere mu bukungu no mu mibereho myiza.

Ibirori byabanjirijwe no gutaha ibikorwa remezo bitandukanye, kuri uyu wa 03 Nyakanga, birimo gutaha inzu y’ababyeyi ku Kigonderabuzima cya Kinihira, inzu y’ababyeyi ku Kigo Nderabuzima cya Kiyanza, amacumbi 8 yubakiwe abarokotse Jenoside yakorewe Abatutsi batishoboye, ibiraro 4 byo mu kirere bifasha abaturage koroshya ubuhahirane, gutaha ibyumba by’amashuri na workshops byubatswe ku bigo by’amashuri bya APEKI TSS mu murenge wa Tumba na Kinihira TVET.

Ubutumwa bwatanzwe bwagarutse ku butwari, gukunda igihugu no kudacika intege byaranze ingabo zari iza RPA zirangajwe imbere n'uwari Umugaba Mukuru wazo HE Paul Kagame, basaba abakiri bato n'urubyiruko kubafataho urugero no kwishimira ibikorwa by'iterambere byagezweho, kandi bagaharanira guhuza imbaraga bakiteza imbere bahereye ku mahirwe igihugu kibaha.

Abaturage basabwe gukora bakiteza imbere, gusigasira ibyagezweho no kurangwa n'ubufatanye mu kubungabunga umutekano.

Mu Mirenge ibirori yose  byaranzwe no kumurika ibikorwa biteza imbere umuturage byagezweho, imbyino, ubusabane n'imikino y'umupira w'amaguru, hishimirwa ibyagezweho mu iterambere, hazirikanwa insanganyamatsiko igira iti : Kwibohora isooko yo kwigira.