Ku wa Gatandatu, tariki 15/10/2022, hirya no hino mu Mirenge igize Akarere ka Rulindo, habereye ibirori byo kwizihiza umunsi mpuzamahanga w’ umugore wo mu cyaro, hazirikanwa insanganyamatsikoko igira iti: “Iterambere ry’umugore wo mucyaro, Inkingi y’ubukungu bw’igihugu cyacu.”

Ibirori byo kwizihiza uyu munsi byaranzwe no kumurika no kwishimira umusaruro ukomoka ku buhinzi, ubworozi, ubukorikori n'imyuga, wagezweho abagore babigizemo uruhare; kuremera imwe mu miryango ifite amikoro make, imiganda yo gusana no kubakira abafite amazu adatunganye n'abadafite amacumbi. Hatanzwe kandi impanuro z'abayobozi bakangurira abagore kwitinyuka, bagakora kandi bakizigama bagatera imbere.

Ku rwego rw'Akarere ibirori byabereye mu Murenge wa Burega byitabirwa n'Umunyamabanga Nshingwabikorwa w'Intara y'Amajyaruguru Dr. Geoffrey MUSHAIJA ari nawe wari umushyitsi Mukuru, Umuyobozi w'Akarere ka Rulindo Madame Judith MUKANYIRIGIRA n'abahagarariye inzego z'umutekano zikorera mu Karere, Umuyobozi w'Inama y'igihugu y'Abagore mu karere Mame Diane NGARUYIMANZI, Umunyambanga Nshingwabikorwa wa ARCT Ruhuka Madame Jane ABATONI, intumwa ya Profemme Twese hamwe Madame Marie Mediatrice UMUBYEYI, Umujyanama mu Nama Njyanama y'Akarere Madame Henriette T. MUREKATETE n'abaturage b'Umurenge wa Burega.

Ngaruyimanzi Diane, Umuhuzabikorwa w’Inama y’Igihugu y’abagore, yavuze ko umunsi nk’uyu uba ari uwo kwibaza uko umugore wo mu cyaro abayeho no kumenya icyo akwiye gukora cyangwa kunganirwa kugira ngo na we abashe gutera imbere, hakavaho imbogamizi zose zituma adatera imbere. Yakomeje avuga ko ari umunsi wo kuzirikana iterambere ry’umugore n’umuryango muri rusange. Yibukije abgore ko bagomba kwigirira icyizere, bagakora imirimo ibyara inyungu, bakunganira abagabo mu iterambere ry’umuryango.

Umuyobozi w’Akarere ka Rulindo Madamu MUKANYIRIGIRA Judith mu butumwa yahaye abaturage bitabiriye uyu munsi, yabasabye kwimakaza uburinganire n’ubwuzuzanye mu miryango no kwirinda amakimbirane, kuko ariyo ntandaro y’ibibazo birimo kudatera imbere ku mugore n’umuryango muri rusange. Yasabye abagize umuryango gukorera hamwe bagashaka ibiteza umuryango imbere, bakita ku burere bw’abana kandi bakabajyana mu ishuri. Yashimiye ubuyobozi bwiza bw’igihugu bwahaye ijambo umugore, nyuma y’uko abagore bo hambere bahuraga n’inzitizi zo guhezwa mu bikorwa by’iterambere nko kujya mu ishuri, gukorana n’ibigo by’imari, gukora imirimo ibyara inyungu n’izindi zakuweho, ubu umugore  nawe akaba yarahawe ijambo. Yasabye ababyeyi gufata umwana w’umukobwa n’uw’umuhungu kimwe, kandi bose bagahabwa amahirwe angana kuko umukobwa nawe ashoboye.

Ati “Umugore ni inkingi ya mwamba y’umuryango, iyo umuryango urimo amakimbirane abana bata amashuri, bakajya mu biyobyabwenge; ariko nanone umuryango waba uteye imbere kandi ubanye neza izo ngaruka ku bana ntizibeho; duharanire ubwuzuzanye mu kubaka umuryango.”

Dr MUSHAIJA Geoffrey, Umunyamabanga Nshingwabikorwa w’Intara y’Amajyaruguru yashimiye abagore bo mu cyaro, akazi gakomeye bakora ko kwita ku muryango, kandi bagafatanya n’abagabo gushakisha ibitunga umuryango. Yagize ati : “Umugore wo mu cyaro akora akazi katoroshye, abyuka kare, akaryama atinze, kandi byose akabikora mu nyungu z’umuryango, akwiye icyubahiro kuko ni inking ya mwamba y’umuryango.” Umunyamabanga Nshingwabikorwa w’Intara y’Amajyaruguru yasabye abagize umuryango kubana mu bwuzuzanye, kandi abashinga ingo babanje gusezerana mu mategeko, bagira amahirwe yo kubyara, bakabyara abo bashoboye kurera, kuko ari bimwe mu bizabafasha kubaka umuryango ushoboye kandi utekanye.

Hagamijwe gufasha umugore wo mu cyaro mu rugamba rw'iterambere imwe mu miryango ifite amikoro make, yaremewe ihabwa imbabura 39 zo kubafasha kurondereza ibicanwa no kurengera ibidukikije; abandi bahabwa ibiribwa; abandi baremerwa umusanzu w'ubwisungane mu kwivuza (mitiweli), abandi bahabwa inka.

Ku bufatanye na Profemmes Twese Hamwe na ARCT Ruhuka abagore bibumbiye mu matsinda bahuguwe ku isanamitima no kurwanya amakimbirane bahawe ibyemezo by'ishimwe baremerwa n'amafaranga yo kubafasha gutangira kwizigamira mu matsinda, basabwa kandi kwigisha bagenzi babo bagafatana urunana mu iterambere.

Ibirori byashojwe n’imbyino, abaturage basabana n’abayobozi, bacinya akadiho.