Muri iyi minsi 100 yo kwibuka ku nshuro ya 31 jenoside yakorewe abatutsi mu Rwanda ,Kuri uyu wa kane tariki ya 24 Mata 2025 mu mirenge yose igize Akarere ka Rulindo hibutswe abagore n’abana bishwe  bazira uko baremwe.

Igikorwa cyo kwibuka ku nshuro ya 31 jenoside yakorewe abatutsi 1994 cyitabiriwe n’abayobozi ,abakozi b’akarere,inzego z’umutekano, abagize inama y’igihugu y’abagore ndetse n’abaturage 

Abakitabiriye igikorwa cyo kwibuka mu mirenge yose igize Akarere  babanje Gufata umunota wo kwibuka no guha icyubahiro abazize Jenoside yakorewe  abatutsi 1994 ndetse bashyira indabo ku rwibutso mu rwego rwo kunamira imibiri ishyinguyemo, nyuma bahabwa ikiganiro ku mateka ya Jenoside basobanurirwa uburyo yateguwe ikanashyirwa mu bikorwa.

Ni ikiganiro gifitwe umutwe ugira uti : Jenoside yakorewe abatutsi1994, Isomo ku Banyarwanda ku Mahanga n'ibihugu byo 

Mu gikorwa cyo kwibuka abana n’abagore bazize jenoside yakorewe abatutsi mu murenge wa Kisaro umuyobozi w'akarere wungirije ushinzwe imibereho myiza y'Abaturage  MUTAGANDA Théophile  yifatanyije n'abaturage bo muri uyu murenge,aho yavuze ko kwibuka abagore  ari mu rwego rwo kuzirikana ko habayeho ibigwari byirengangije uruhare imana yahaye abagore mu kubaho kw’abantu, kuko abagore aribo baza ku mwanya wa mbere iyo bavuze ababyeyi kandi ko aribo bagira uruhare runini mu kurerera igihugu

MUTAGANDA Théophile  kandi   yibukije abitabiriye igikorwa cyo kwibuka kunshuro ya 31 jenoside ya korewe abatutsi Akarere ka Rulindo kashyizeho gahunda yo kwibuka n'ibyiciro  byihariye birimo abagore n'abana kuko aribo bagira uruhare runini kugirango umuryango ubeho bityo n'igihugu kikabaho.

Umuyobozi w’Akarere ushinzwe imibereho myiza y’Abaturage MUTAGANDA  Théophile  yongeyeho ko kwibuka abana bishwe muri jenoside yakorewe abatutsi ari umwanya wo kuzirikana no kugaya imigambi mibisha y’abakoze jenoside. Yagize ati:”bigaragara ko bari bagambiriye kwica imbuto kugirango imiryango y’abatutsi bari bibasiwe izazime burundu.uyu ukaba ari umwanya wo kwibuka abantu bose bazize jenoside yakorewe abatutsi tukabazirikana kandi tukabunamira.”

MUTAGANDA Théophile  yakomeje avuga ko uyu ari umwanya wo kwihanganisha abarokotse jenoside yakorewe abatutsi ko bikwiye ko muri ibi bihe bitoroshye ari igihe cyo kubaba hafi kandi tukabafsha kudaheranwa n’agahinda.

Ibikorwa byo kwibuka mu karere ka Rulindo bizakomeza kugera tariki ya 27 kamena 2025 hibukwa imiryango yazimye kubera jenoside ndetse no kwibuka urubyiruko rwazize jenoside yakorewe abatutsi 1994.