Abaturage b’Akarere ka Rulindo bashyikirijwe imbabura zizabafasha kurondereza ibicanwa. Ni igikorwa cyatangirijwe mu Murenge wa Rusiga, kuri uyu wa gatatu, tariki ya 09 Ugushyingo, 2022, aho baturage basaga ibihumbi bitatu bahwe izo mbabura. Ni Imbabura zatanzwe ku bufatanye na BB Energy binyuze muri Quality Engineering Company Ltd.

Ku ikubitiro hatanzwe imbabura ibihumbi bitatu zahawe abaturage b’Umurenge wa Rusiga, ariko igikorwa kikaba gikomereje mu yindi mirenge 10, hakaba hazatangwa imbabura ibihumbi 12. Ni imbabura zihabwa buri muryango hatitawe ku cyiciro cy'ubudehe ubarizwamo; hagamijwe kugabanya ibicanwa, kurengera ibidukikije, guteza imbere imibereho myiza y'abagize umuryango no kubarinda indwara z'ubuhumekero ziterwa n'imyotsi. Buri muryango ukaba ugenewe imbabura imwe, ariko uko umushinga uzakomeza, zikaba zizagenda zongerwa.

Umuyobozi w'Akarere ka Rulindo, wungirije ushinzwe Ubukungu Bwana MUTSINZI Antoine

Umuyobozi w'Akarere  ka Rulindo wungirije ushinzwe ubukungu Bwana Mutsinzi Antoine yasabye abaturage gukoresha neza imbabura bahawe, bakirinda kuzigurisha ahubwo bakazikoresha uko zagenewe gukoreshwa, kandi bakirinda kuzangiza.

Umuyobozi Mukuru wa Quality Engineering Compnay Ltd,  Eng. Prosper UMWIZERWA yasobanuriye  abaturage uko izi mbabura zikoreshwa, abasaba kurangwa n’ubunyangamugayo, birinda kuzigurisha, kuko zije kuba ibisubizo mu miryango yabo.  Yagize ati: “izi mbabura rero zije kubagabanyiriza imvune mwagiraga mujya gushaka inkwi, kuko ingano y’ibicanwa mwakoreshaga igiye kugabanuka ku kigero cya 65%,  bizarinda abana gukererwa kujya ku ishuri babanje kujya gushaka ibicanwa, bizabafasha kwirinda indwara z’ubuhumekero mwaterwaga n’imyotsi; kandi zizadufasha twese kubungabunga ibidukikijie.”Umuyobozi Mukuru wa Quality Engineering Compnay Ltd,  Eng. Prosper UMWIZERWA, asobanura uko imbabura ikoreshwa

Chief Investment wa BB Energy, Baha Bassatne Jr, yijeje abaturage ubufatanye, abasaba kuba intangarugero mu kubungabunga ibidukikije kuko iyo bitabungabunzwe uko bikwiye bigira ingaruka ku ihindagurika ry’ikirere, imvura ikabura, abahinzi bagahinga bakarumbya.

Chief Investment wa BB Energy, Baha Bassatne Jr, ashyikiriza imbabura umuturage

Mukangirimana Valentine, utuye umurenge wa Rusiga,  Akagari ka Gako, umudugudu wa Kabuye, avuga ko iyi mbabura amaze icyumweru ayikoresha, avuga ko yamufashije cyane kurondereza ibicanwa, kuko ikoresha inkwi nkeya kandi igahisha vuba. Ngo akarusho k’iyo mbabura ni uko ubushyuhe bwose buhamamo imbere ntihagire ubushyuhe bugera inyuma, ku buryo n’iyo umwana muto yakoraho utetse atashya. Mukangirimana Valentine avuga ko iyo arebye abona inkwi yacanaga icyumweru kimwe azajya azicana nk’ibyumweru 5.

Abaturage bishimiye izi mbabura bahawe, bavuga ko zije kubaruhura ibibazo byo kubura ibicanwa no kurwara indwara z'ubuhumekero, baterwaga n'imyotsi ituruka ku bicanwa byabaga bitumye, kubera no kubibura.