Kuri uyu wa kabiri, ikigo cy’igihugu gishinzwe ubutaka (National Land Authority)  cyahuguye intore mu ikoranabuhanga zikorera mu mirenge yose igize Akarere ka Rulindo.

Amahugurwa yari agamije kongerera ubumenyi n’ubushobozi Intore mu Ikoranabuhanga kugira ngo barusheho gutanga ubufasha bunoze ku baturage mu bijyanye n’imikoreshereze y’ikoranabuhanga mu guhabwa serivisi z’ubutaka.

Abitabiriye amahugurwa bahawe ubumenyi butandukanye  ku mahame agenga imicungire y’ubutaka, hagamijwe kurushaho kunoza imitangire ya serivisi.

Madamu Christine NYIRANSHIMIYIMANA ushinzwe kwandika ubutaka mu mujyi wa Kigali asobanura ko Itangwa rya serivisi z’ubutaka binyuze kuri Irembo (Delivery of Land Services via Irembo Platform) :n’uburyo abaturage bashobora kubona serivisi z’ubutaka hifashishijwe urubuga rwa Irembo. Ndetse n’igenamikorere ry’imikoreshereze y’ubutaka n’amabwiriza agenga ikoreshwa ryabwo (Land Use Master Plan and Zoning Regulation) ,hasobanurwa uburyo igenamigambi ry’ubutaka rikorwa n’icyo rigamije mu miyoborere n’iterambere ry’akarere.

Intore mu Ikoranabuhanga zagaragaje imbogamizi zijyanye no gukorana n’inzego z’ibanze, cyane cyane ku rwego rw’imirenge kuko ubusanzwe Zikorera ku rwego rw’akagari, aho byagaragaye ko hari ubwo bisaba ubufatanye bwihuse kugira ngo abaturage babone serivisi z’ubutaka ku gihe. Basabye ko habaho ubufatanye buhamye hagati y’Intore mu Ikoranabuhanga n’ubuyobozi bw’imirenge, hagamijwe gufasha abaturage kurushaho kubona serivisi neza kandi mu buryo buboneye.

Umuyobozi w’ishami ry’ubutaka  mu kigo cy’igihugu cy’ubutaka madamu AKIMANA Yvonne  yasabye intore mu ikoranabuhanga ko kubyaza umusaruro aya mahugurwa ndetse yemeza ko azabafasha kuzuza neza inshingano kuko abafasha  kwongera ubumenyi ku mikoreshereze y’imbuga z’ikoranabuhanga mu nzego z’ubutaka.