Muri iki  gihe twibuka ku nshuro ya 32 Jenoside yakorewe Abatutsi mu 1994, kuri uyu wa Gatanu mu Karere ka Rulindo hashyinguwe mu cyubahiro imibiri 2,134 y’abazize Jenoside yakorewe Abatutsi.

Iyi mibiri irimo 2,117 yimuwe mu rwibutso rwa Shyorongi muri gahunda yo guhuza inzibutso, indi 10 yimuwe ivanywe mu ngo zitandukanye, ndetse n’indi 7 yabonetse ahantu hatandukanye harimo mu Kiziba mu Murenge wa Rusiga no mu gice cy’Umurenge wa Shyorongi.

Iyo mibiri yose yashyinguwe mu cyubahiro mu Rwibutso rwa Jenoside Yakorewe Abatutsi  rwa Rusiga.

Urwibutso rwa jenoside Yakorewe Abatutsi rwa Rusiga ubu ruruhukiyemo imibiri 8,831

Mbere y’iki gikorwa, Urwibutso rwa Rusiga rwari rusanzwe ruruhukiyemo imibiri 6,697 y’abazize Jenoside yakorewe Abatutsi. Nyuma yo kwakira indi mibiri 2,134, ubu rusigaye ruruhukiyemo imibiri 8,831.

Abarokotse Jenoside yakorewe Abatutsi bo mu Karere ka Rulindo  ko bashima ko uburyo gahunda yo guhuza inzibutso yagenze neza, kuko ituma imibiri y’ababo irushaho kubungabungwa no guhabwa icyubahiro gikwiye.ndetse bagashimira ubuyobozi bw’Akarere ka Rulindo uburyo bubafasha mu guteza imbere imibereho myiza yabo.

  Uwavuze mu izina ry'uhagarariye  Abafite Ababo bimuwe mu rwibutso rwa Jenoside Yakorewe Abatutsi rwa Shyorongi

Rulindo yasigaranye inzibutso 6

Mu rwego rwa gahunda ya Leta yo guhuza no kuvugurura inzibutso, Akarere ka Rulindo kasoje urugendo rwo kuzigabanya kava ku nzibutso 9 gasigarana inzibutso za jenoside Yakorewe Abatutsi  6 gusa arizo : urwibutso rwa jenoside Yakorewe Abatutsi rwa Rusiga, urwibutso rwa Mvuzo , Urwibutso rwa Busizi, Urwibutso rwa Remera-Cyinzuzi, Urwibutso rwa Jenoside Yakorewe Abatutsi rwa Mbogo ndetse n’Urwibutso rwa Rutonde. 

Hari inzibutso zikeneye kubakwa byihutirwa

Umuyobozi w’Akarere ka Rulindo, Madamu Mukanyirigira Judith, yavuze ko izi nzibutso zose zikeneye kubakwa no kuvugururwa neza, nubwo hari ebyiri muri zo zikeneye kwitabwaho byihutirwa kurusha izindi.

                                    MUKANYIRIGIRA Judith Umuyobozi w'Akarere ka Rulindo

Guverineri w’Intara y’Amajyaruguru, Mugabowagahunde Maurice, na we yavuze ko uko ubushobozi buzagenda buboneka, izi nzibutso kimwe n’izindi zo mu Ntara y’Amajyaruguru zizakomeza kuvugururwa zikubakwa mu buryo bugezweho bijyanye n’Amabwiriza yashyizweho.

Haracyari imibiri itaraboneka

Guverineri Mugabowagahunde Maurice kandi yavuze ko nubwo ibikorwa byo gushyingura no guhuza inzibutso bikomeje, hakiri imibiri myinshi itaraboneka ngo ishyingurwe mu cyubahiro.

                            MUGABOWAGAHUNDE Maurice Guverineri w'Intara y'Amajyaruguru

Agasaba abaturage bafite amakuru ku hantu hashobora kuba harajugunywe imibiri y’abazize Jenoside b kuyatanga kugira ngo ishyingurwe mu cyubahiro. Ati: “Kuri uyu wa Gatandatu mu rwibutso rwa Jenoside Yakorewe Abatutsi rwa Mvuzo harashyingurwa indi mibiri 176 yabonetse nyuma y’imyaka 32 mu Murenge wa Ngoma , aho abantu bahoze bahasengera ndetse banahakorera ibikorwa bitandukanye”.

Kugeza ubu mu Karere ka Rulindo  inzibutso za Jenoside Yakorewe Abatutsi mu 1994 zose hamwe ziruhukiyemo imibiri ibihumbi  19,474 y’abazize Jenoside yakorewe Abatutsi.