Ibi yabigarutseho kuri uyu wa kabiri mu nama y’umutekano yahuje abahagarariye ibyiciro bitandukanye mu murenge wa Masoro n’umuyobozi w’Akarere MUKANYIRIGIRA Judith ari kumwe n’umuyobozi w’ingabo mu ntara y’Amajyaruruguru ndetse n’umuyobozi wungirije wa polisi muri iyi ntara CSP Prudence NGENDAHIMANA. 

Iyi nama yitabiriwe  n’abayobozi  kuva kuri mutwarasibo , abashinzwe ubujyanama mu mibereho myiza n’iterambere abanyamadini n’amatorero abikorera n’abavuga rikumvikana mu murenge wa Masoro.

Umuyobozi w’Akarere madamu MUKANYIRIGIRA Judith yibukije aba bayobozi amahitamo y’igihugu ariyo: Ubumwe bw’Abanyarwanda,Kubazwa inshingano no gutekereza byagutse abasobanurira icyerekezo cy’igihugu 2050 na gahunda y’igihugu y’imyaka itanu yo kwihutisha iterambere NST2,  abasaba gufatanya mu kugeza abaturage ku iterambere umukuru w’igihugu yifuriza abanyarwanda.

                                Umuyobozi w'Akarere ka Rulindo Madamu MUKANYIRIGIRA Judith

Mu nama y’umutekano yabereye mu murenge wa Masoro yanagarutse ku kibazo cy’abaturage bishora mu bucukuzi bw’amabuye y’agaciro butumewe Madamu MUKOSHIKI Zainabu ukuriye urwego rw’ubugenzacyaha mu Karere yibukije aba bayobozi ko hari itegeko n’ibihano bihabwa umuntu ukora ubucukuzi butemewe abasaba no kubisobanurira abaturage bakamenya ko hari ibihano biremereye ku muntu wishora muri ubwo bucukuzi.

Umuyobozi wa polisi wungirije mu ntara y’Amajyaraguru CSP Prudence NGENDAHIMANA  yasabye aba bayobozi bo muri uyu murenge wa Masoro gufatanya kurwanya ibyaha cyane cyane byumwihariko ibiyobyabwenge, ubujura n’ubucukuzi bw’amabuye y’agaciro butemewe.

 CSP Prudence NGENDAHIMANA  yibukije aba bayobozi ko ibiyobyabwenge,n’ubucukuzi butemewe bigira ingaruka nyinshi  ku baturage zirimo ubwicanyi bwa hato na hato,amakimbirane mu miryango,kuba abana bata amashuri n’izindi ngaruka zitandukanye, bityo ko abayobozi aribo bafite inshingano zo gukumira izi ngaruka kandi ko uruhare rwa buri wese rukenewe.

                           Umuyobozi wa polisi wungirije mu ntara y'Amajyaruguru CSP Prudence NGENDAHIMANA

Umuyobozi w’Ingabo mu ntara y’Amajyaruguru COL Steven KAYIGUMIRE muri iyi nama y’umutekano yabanje kwizeza abayitabiriye ko igihugu kirinzwe neza  kandi ko umutekano w’igihugu  uzakomeza kumera neza.

Col. Steven KAYIGUMIRE nawe yagarutse ku mahitamo y’igihugu ndetse yibutsa abayobozi ko mu byo bakora byose bagomba gukorera umuturage. Col KAYIGUMIRE Steven yasabye aba bayobozi gufatanya mu gukemura ibibazo by’abaturage bashyira umuturage ku isonga.