Kuri uyu wa gatandatu  mu Karere ka Rulindo, ku Rwibutso rwa Jenoside yakorewe Abatutsi rwa Mvuzo, habereye igikorwa cyo Kwibuka ku nshuro ya 32 Jenoside yakorewe Abatutsi mu 1994 no gushyingura mu cyubahiro imibiri 176 yabonetse kuri Centrale Gatolika ya Gitete.

Iki gikorwa cyitabiriwe n’abayobozi batandukanye ku rwego rw’Igihugu n’Intara, barimo Perezida w’Inteko Ishinga Amategeko, Hon. Gertrude Kazarwa, wari n’umushyitsi mukuru.

Hari kandi Minisitiri w’Ubumwe bw’Abanyarwanda n’Inshingano Mboneragihugu, Dr Jean Damascène Bizimana, Guverineri w’Intara y’Amajyaruguru, Mugabowagahunde Maurice, ari kumwe n’abagize Inama y’Umutekano Itaguye y’Intara.

Abandi bitabiriye iki gikorwa ni abagize Inteko Ishinga Amategeko, abagize Inama Njyanama y’Akarere ka Rulindo, Komite Nyobozi y’Akarere ndetse n’abagize Inama y’Umutekano Itaguye y’Akarere.

Abari bitabiriye iki gikorwa bahawe ikiganiro kijyanye no Kwibuka ku nshuro ya 32 Jenoside yakorewe Abatutsi mu 1994, cyatanzwe na Minisitiri Dr Jean Damascène Bizimana.Iki kiganiro cyagarutse cyane ku mateka ya Jenoside yakorewe Abatutsi mu Karere ka Rulindo, uburyo yakozwe ndetse n’amasomo akwiye gukurwamo kugira ngo Jenoside itazongera kubaho ukundi.

Dr. BIZIMANA Jean Damascenie Minisitiri w'Ubumwe bw'Abanyarwanda n'Inshingano Mboneragihugu yunamiye inzirikarengane zishyinguye mu Rwibutso rwa Jenoside Yakorewe Abatutsi rwa Mvuzo.

Mu butumwa bw’umushyitsi mukuru, Hon. Gertrude Kazarwa yihanganishije abarokotse Jenoside yakorewe Abatutsi, anabashimira ubutwari n’uruhare bakomeje kugira mu kubaka Igihugu.

Yanashimye Ingabo zari iza RPF Inkotanyi zahagaritse Jenoside yakorewe Abatutsi, zikarokora abari basigaye ndetse zikagira uruhare rukomeye mu kongera kubaka u Rwanda rwunze ubumwe, rufite amahoro n’iterambere.yagize Ati: “Icyiza cyane dushimiri imana n’inkotanyi, inkotanyi mwarakoze turabashimira Uyu munsi turashimira ko dufite igihugu cyiza n’ingabo zahagaritse Jenoside ziyobowe na Nyakubahwa perezida wa Repubulika  Paul Kagame”.

Hon KAZARWA Gertrude yanasabye abantu bagifite Amakuru y’Ahantu hari imibiri kuyatanga abantu bagashyingurwa mu cyubahiro Ati: “Ni ibintu by’ingenzi cyane ko muturangira ahantu abantu bajugunywe kugirango tubashyingure mu cyubahiro, turabasaba twinginga cyane muduhe amakuru arebane n’ahakiri imibiri y’abazize Jenoside Yakorewe Abatutsi 1994.

Hon KAZARWA Gertrude Perezida w'Inteko Ishingamategeko y'u Rwanda hamwe n'Abadepite bagize inteko Ishingamategeko bunamiye imibiri ishyinguye mu rwibutso rwa Jenoside Yakorewe Abatutsi rwa Mvuzo

Hon KAZARWA Gertrude Yashimangiye ko igihugu cyacu gifite amahitamo atatu cyahisemo  hagamijwe kubaka igihugu no guteza imbere Abanyarwanda bityo ko buri mu nyarwanda wese agomba kugira icyizere cyo kubaho neza. Ati: Aha duteraniye kuri uyu munsi twabwiwe amateka yuko jenoside yakozwe ndetse n’umusaraba abaruhukiye muri uru rwibutso banyuzemo nkaba shimira Murebwayire Alphonsine watanze Ubuhamya bw’ibyo yanyuzemo akaba afite icyizere cyo kubaho neza ndetse Abanyarwanda twese dufite icyizere cyo kubaho neza kuko dufite igihugu cyiza kidufasha kubaho neza kandi dutekanye

Imibiri 176 yashyinguwe mu cyubahiro yabonetse nyuma y’imyaka 32 Jenoside yakorewe Abatutsi ibaye, bikaba byongeye kwibutsa ko hakiri inshingano yo gushakisha no gutanga amakuru y’ahakiri imibiri y’abazize Jenoside itaraboneka.