Kuri uyu wa gatandatu , mu mirenge yose igize Akarere ka Rulindo hakozwe Umuganda rusange usoza ukwezi kwa Mata, aho abayobozi b’akarere bifatanyije n’abaturage mu bikorwa bitandukanye bigamije iterambere n’imibereho myiza.

Umuyobozi w’Akarere yifatanyije n’abaturage ba Tumba

Umuyobozi w’Akarere ka Rulindo, Madamu MUKANYIRIGIRA Judith, ari kumwe n’abagize inzego z’umutekano, bifatanyije n’abaturage bo mu Umurenge wa Tumba mu Kagari ka Taba.

Umuganda wakozwe wibanze ku kubumba amatafari no gusiza ikibanza kizubakwamo inzu y’umukecuru Mukamana Liberata.

Base, Cyungo na Rukozo hibanzwe ku kurwanya ubucukuzi butemewe

Umuyobozi w’Akarere wungirije ushinzwe iterambere ry’ubukungu, Bwana RUGERINYANGE Theoneste, yifatanyije n’abaturage bo mu Umurenge wa Base mu Kagari ka Cyohoha, hamwe n’abaturage bo mu Kagari ka Burehe mu Umurenge wa Cyungo ndetse n’abo mu Kagari ka Bwimo mu Umurenge wa Rukozo.

Umuganda waho wibanze ku gusiba ahangijwe n’abacukura zahabu mu buryo butemewe n’amategeko. Nyuma yawo, abaturage nabo bahawe ubutumwa bwateguwe.

Murambi hibanzwe ku gutunganya ibibanza bizubakwamo amazu

Umuyobozi w’Akarere wungirije ushinzwe imibereho myiza y’abaturage, Bwana MUTAGANDA Theophile, ari kumwe na IP Dieudonné IBARINDE, bifatanyije n’abaturage bo mu Umurenge wa Murambi mu Kagari ka Mvuzo.

Umuganda waho wibanze ku gusiza ibibanza bizubakwamo amazu, hagamijwe guteza imbere imibereho myiza y’abaturage no kubafasha kubona aho kuba heza.

Nyuma y’umuganda, abaturage bahawe ubutumwa butandukanye bwateguwe na Minisiteri y'Ubutegetsi bw'Igihugu.burimo  Kwitabira umurimo no kwizigamira; Kujyana abana bose mu ishuri; Kwita ku mirire n’imikurire y’abana, Kwirinda amakimbirane mu muryango. 

Abaturage kandi bakanguriwe kurushaho kwimakaza isuku hose haba ku mubiri, mu rugo, aho dukorera ndetse n’ahahurira Abantu benshi.

By’Umwihariko abaturage bari mu nzira yo kwiteza imbere bakanguriwe gukoresha neza amahirwe babona binyuze muri gahunda za Leta n’abafatanyabikorwa kugira ngo bibafashe gutera imbere.

Ibikorwa by’Umuganda bikomeje kugaragaza uruhare rw’abaturage n’inzego z’ubuyobozi mu kubaka igihugu, gukemura ibibazo by’abaturage no guteza imbere imibereho myiza y’abatuye Akarere ka Rulindo.