Urwego rw'Umuvunyi, ruyobowe n’Umuvunyi Mukuru Madame NIRERE Madeleine , guhera ku wa 08 Gashyantare kugeza ku wa 11 Gashyantare rwagiriye uruzinduko mu Karere ka Rulindo, mu rwego rwo kurwanya akarengane na ruswa. Muri uru ruzinduko, Urwego rw’Umuvunyi rwasuye imirenge ya Base, Kinihira, Tumba, Murambi, Rusiga na Buyoga, muri gahunda yo gukumira no kurwanya akarengane na Ruswa.

Mu mirenge yasuwe, abaturage bagaragaje ibibazo bafite bitakemuwe cyangwa ibyakemuriwe mu zindi nzego, bakaba bataranyuzwe n’imikirize yabyo.  Ibibazo byakiriwe byahawe umurongo, ndetse abakeneye ubufasha mu by’amategeko bayoborwa inzira bazanyuramo ngo bahabwe ubutabera.

Ibibazo byabajijwe ibyinshi bishingiye ku manza z’imitungo (ubutaka) y’imiryango, ibibazo bishingiye ku ngurane ikwiye z’ahanyujijwe ibikorwa remezo n’ibibazo bya ba Rwiyemezamirimo batishyuye abaturage bakoresheje.

Nk'uko byagaragajwe mu Mirenge yasuwe yose uko  ari 6, hakiriwe ibibazo by'abaturage 81; muri byo ibibazo 6 bizakuri bigakemuka n'ibibazo 29 byahawe Umurongo.

Umuvunyi Mukuru, Madame Nirere Madeleine yasabye ubuyobozi bw’Akarere gukorana n’inzego zitandukanye zirebwa n’ibibazo byagaragajwe n’abaturage harimo RTDA, REG, ba Rwiyemezamirimo bakoresheje abaturage bakaba batarabishyuye, abo baturage bakarenganurwa bagahabwa uburenganzira bwabo.

Mu rwego rwo gukomeza guha serivisi nziza abaturage, Umuvunyi Mukuru yasabwe ko hakomeza gukurikiranwa imikorere y'abunzi kandi bagahabwa amahugurwa kugira ngo bahe abaturage serivisi nziza kandi inoze. Abaturage na bo bakigishwa amategeko, igihe hateranye inteko z’abaturage cyangwa izindi nama, bagahugurwa ku mategeko anyuranye, kuko byagaragaye ko hari igihe umuturage abura uburenganzira bwe ku mpamvu zo tukamenya icyo amategeko ateganya.

Ubuyobozi bw’Akarere bwashimiye Umuvunyi Mukuru ku nkunga badahwema gutera Akarere, by’umwihariko mu kwegera abaturage no kubakemurira ibibazo. Ubuyobozi bw’Akarere bukaba bwijeje ko bugiye kwegera abaturage ibibazo byagejejwe ku muvunyi bigakemurwa mu gihe cya vuba, ndetse n’ibitagejejwe ku Muvunyi bigakemurwa, Umuturage agahora ku Isonga.