Kuri uyu wa gatatu  umuyobozi w'Akarere Madamu MUKANYIRIGIRA Judith ari kumwe n'abagize inzego z'umutekano yakiriye itsinda ry'Abasenateri bagize komisiyo y'Ububanyi n'Amahanga Ubutwererane  n'umutekano  bari kugenzura ishyirwa mu bikorwa ry'ingamba zo kurwanya no gukumira impanuka zo mu muhanda.

Iri tsinda ryari riyobowe na Hon Senateri Hadija Ndagiza MURANGWA ryagaragarijwe uko umutekano wo mu muhanda wari wifashe mu karere ka Rulindo mu mezi atatu ashize ndetse baganira n'abahagarariye ibyiciro bitandukanye bafite aho bahurira n'ibinyabiziga barebera hamwe impamvu zikunze guteza impanuka zo mu muhanda.

Nyuma y'Ibiganiro Abasenateri hamwe n'umuyobozi w'Akarere ndetse na Polisi basuye ishuri ryigisha gutwara ibinyabiziga ryo kwa SINA Gerard ndetse basura umuhanda Base- Gicumbi  mu ikorosi riherereye Sakara mu murenge wa Cyungo barebera hamwe icyakorwa mu gukumira impanuka zikunze kuhabera.