Gutangiza igihembwe cy’ihinga C byabereye mu gishanga cya bahimba gihingwamo na koperative COVAMABA,abahinzi bafatanyije n’umuyobozi w’akarere hamwe n’abafatanyabikorwa batandukanye bafasha iyi koperative bakaba bateye imbuto y’ibirayi ku buso bungana na hegitari 2 ahandi hakazaterwa muri iyi minsi iri mbere

 Mbere yo gutangira gutera umwe mu bahinzi ntangarugero MUKESHIMANA Valentine yabanje gusobanurira bagenzi be uko bahinga imbuto y’ibirayi ihingwa  hakoreshejwe ifumbire y’imborera n’imvaruganda bituma ibirayi byera neza. 

  Mugutangiza igihembwe cy’ihinga c koperative COVAMABA yanashyikirijwe toni 60 z’ifumbire ya NPK ndetse na toni 300 z’ishwagara n’imiti yica udukoko.

Umuyobozi wa koperative COVAMABA HAKIZIMANA Thacien yashimiye ubuyobozi bw’Akarere bubafasha kubona nkunganire no  kubashakira abaterankunga kandi agashimira umufatanyabikorwa solid Africa  ubafasha mu kubashakira umuguzi w’umusaruro wabo  na Horeco ibafasha mu buryo bwo kwita no gucunga umusaruro wabo.

     HAKIZIMANA Thacien umuyobozi wa Koperative COVAMABA asobanura ibihingwa koperative yabo ihinga

HAKIZIMANA Thacien yongeyeho ko ashimira Solid Africa ku nkunga y’inyongeramusaruro n’imiti yica udukoko yabahaye bizabafasha kwita ku bihingwa bityo bakabona umusaruro bifuza.

                                  Alex RUSAGARA umuyobozi wa Solid Africa mu karere ka Rulindo

Alex RUSAGARA uhagarariye umushinga Solid Africa ashimira abahinzi bo muri COVAMABA uburyo bakorana umurava ndetse ko solid Africa izakomeza kubafasha hagamijwe guteza imbere ubuhinzi no kurwanya imirire mibi nkuko biri mu nshingano zabo.

                       RUGERINYANGE Theonest umuyobozi w'Akarere wungirije ushinzwe iterambere ry'ubukungu

Umuyobozi w’Akarere wungirije ushinzwe iterambere ry’ubukungu RUGERINYANGE Theoneste yasabye abahinzi ba COVAMABA kwita ku bihingwa no gufata neza umusaruro ndetse yashimiye abafatanyabikorwa ba solid Africa na Horeco ku ruhare rwabo mu guteza imbere abahinzi.

Koperative COVAMABA ifite abanyamuryango barenga ibihumbi 4000 ikaba ikora ubuhinzi bw’ibigori,ibishyimbo, imboga ndetse n’ibirayi.