Kuri uyu wa kabiri umuyobozi w’Akarere madamu MUKANYIRIGIRA Judith yakiriye madamu NANCY Reynolds n’itsinda  ry’abagize board ya Health builders international umufatanyabikorwa muri serivisi z’ubuzima mu karere ka Rulindo.

Umuryango Health builders ukora ibikorwa bitandukanye bigamije  gufasha abaturage muri serivisi z’ubuzima mu karere ka Rulindo birimo kubaka post de santé,gutanga ibikoresho mu bigo nderabuzima  byifashishwa mu buvuzi no guhugura abakora muri serivisi z’ubuzima.

Umuyobozi w’Akarere hamwe n’umumuyobozi wa health builders ku isi bakaba basuye post de santé ya NKANGA  ihereye mu murenge wa Rusiga n’ikigo nderabuzima cya Shyorongi.

Iyi post de santé ya Nkanga ni imwe muzubatswe na Health builders ikaba itanga serivisi zitandukanye ku baturage batuye mu kagali ka Gako harimo nizo gufasha ababyeyi mu gihe cyo kubyara.Abaturage bagana iyi Post de santé bakaba bashimira Health Builders yubatse iri vuriro kuko ryabafashije kubona serivisi z’ubuvuzi hafi.

UWIMANA Venantie avuga ko ashimira cyane ubuyobozi bw’Akarere na Health builders babegereje iyi post de santé kuko mbere iyo barwaraga  bakoraga urugendo rurerure bajya ku kigo nderabuzima cya Kinini ariko ko ubu byahindutse kuko begerejwe ivuriro.

Umujyanama w’ubuzima MUKAYIRANGA Alphonsine we avuga ko nk’abajyanama b’ubuzima iyi post de santé yabafashije kuko mbere byari bigoye kugeza umubyeyi ku kigo nderabuzima cya kinini mu gihe yabaga afashwe n’inda mu gicuku byabagoraga kuko hari n’igihe bahamagaraga moto ikanga kuza kubatwara bityo bagakora urugendo rw’amasaha arenga 4 n’amagaru ibintu byagiraga ingaruka ku mubyeyi n’umwanana.

Umuyobozi w’ikigo nderabuzima cya Shyorongi Soeur MUKASHYAKA Eugenie nawe ashimira umuryango Health Builders ku bikoresho by’ubuvuzi yabahaye ibikoresho bitandukanye by’ubuvuzi birimo Imashini yifashishwa mu gusuzuma indwara n’amahugurwa ahabwa abakozi n’abajyanama b’ubuzima.

Umuyobozi wa board ya Health builders International NANCY Reynolds ashimira ubufatanye buri hagati y’ubuyobozi bw’Akarere ka Rulindo na Health Builders kandi ko Health Builders itewe ishema no gukorana n’Akarere ka Rulindo ku bwitange bagaragaza mu gushyigikira no guteza imbere ubuzima bw’abaturage harimo no gufatanya mu guhanga program nshyashya ya EMR( Electronical Medical Record) yatangiye gukoreshwa muri Rulindo ubu ikaba isigaye ikoreshwa mu gihugu hose.

Umuyobozi w’Akarere madamu MUKANYIRIGIRA Judith ashima ibimaze kugerwaho kubera ubufatanye bwiza buri hagati y’Akarere ka Rulindo na Health builders, kuko yagize uruhare rukomeye mu guteza imbere serivisi z’ubuzima muri Rulindo cyane cyane mu gufasha abaturage kugerwaho nizo serivisi mu buryo bworoshye no guhugura abakora mu rwego rw’ubuzima

Umuryango Health Builders watangiye ubufatanye n’Akarere ka Rulindo  mu mwaka wa 2017 ukaba ukora ibikorwa bitandukanye bijyanye no guteza imbere serivisi z’ubuvuzi, aho umuze kubaka post de santé 4 mu mirenge itandukanye no gutanga ibikoresho by’ubuvuzi mu bitaro no mu bigo nderabuzima bitandukanye mu karere ka Rulindo.