Muri iki cyumweru cyo kwibuka ku nshuro ya 31 jenoside yakorewe abatutsi mu Rwanda, urubyiruko rwo mu karere ka Rulindo ruherekejwe n’abayobozi b’Akarere  basuye inzibutso za jenoside yakorewe abatutsi mu 1994, hagamijwe kumenya amateka yayo ndetse no kwirinda amacakubiri n’ingengabitekerezo ya jenoside.

Zimwe mu nzibutso zasuwe muri iki cyumweru harimo urwibutso rwa Mvuzo ruherereye mu murenge wa Murambi rwasuwe n’urubyiruko rwo mu mirenge ya Murambi,Ntarabana na Kinihira hagamijwe gusobanukirwa amateka ya jenoside.

Muri iki cyumweru kandi urubyiruko rwo mu mirenge ya burega na cyinzuzi rwasuye urwibutso rwa jenoside yakorewe abatutsi rwa Remere ruri mu murenge wa Cyinzuzi, mu gihe kandi urubyiruko rwo mu murenge wa Shyorongi rwasuye urwibutso rwa jenoside rwa Rutonde rusobanurirwa amateka y’uru rwibutso.

Mu gusura inzubutso hagamijwe kumenya amateka ya jenoside urubyiruko rwari ruherekejwe n’abayobozi  b’Akarere n’abimirenge hamwe n’umuyobozi wa IBUKA mu karere Madamu MUREBWAYIRE Alphonsine.

Muri ibi bikorwa byo gusura inzibutso urubyiruko rusobanurirwa amateka ya jenoside yakorewe abatutsi mu Rwanda bagasobanurirwa uburyo yateguwe ikanashyirwa mubikorwa ndetse urubyiruko rugahabwa umwanya wo kubaza ibibazo.

Tuyishime Angelique  w’imyaka 21 ni umwe mu rubyiruko rwasuye urwibutso rwa jenoside rwa Remera mu murenge wa Cyinzuzi avuga ko nkurubyiruko gusura urwibutso bibafasha kurushaho gusobanukirwa ibyababaye bityo bikabafasha kurwanya ikintu cyose cyatuma jenoside yongera kubaho. 

NDAYISENGA Pacific w’imyaka 23 avuga ko nyuma yo gusobanukirwa amateka y’urwibutso rwa jenoside rwa Rutonde asanga urubyiruko bagenzi be bakwiye kwimakaza ubumwe ndetse bakarwanya abantu bahakana bakanapfobya jenoside cyane cyane ababikora bifashishije imbuga nkoranyambaga. 

Umuyobozi w’Akarere wungirije ushinzwe iterambere ry’ubukungu RUGERINYANGE Theonest mu butumwa yahaye urubyiruko rwo mu murenge wa Shyorongi na Murambi yabasabye Kuba aba mbere mu gukumira ingengabitekerezo ya jenoside mu rubyiruko, Kumenya no gukoresha neza imbuga nkoranyambaga banyomoza abazitwaza mu gupfobya no guhakana Jenoside yakorewe Abatutsi ndetse no Kuba urubyiruko rufite intego rurangwa n'indangagaciro n'imyitwarire myiza.