Kuri uyu wa 25 Gicurasi, 2023, mu Karere ka Rulindo, habereye gahunda y'Igihango cy'Urungano; aho abahagarariye  urubyiruko mu byiciro bitandukanye  bo mu Karere ka Rulindo bahuriye hamwe mu rwego rwo kwibuka urubyiruko rwazize Jenoside yakorewe Abatutsi.

Igikorwa cyitabiriwe n’umuyobozi nshingwabikorwa ushinzwe ubumwe, itorero n'uburere mboneragihugu muri MINUBUMWE n'Umuyobozi w'Akarere ka Rulindo, Madamu Mukanyirigira Judith; Madamu Anita KAYIRANGWA; Abahagarariye Inzego z'umutekano mu Karere ka Rulindo.

Ibiganiro byatanzwe byagarutse ku mateka ya Jenoside yakorewe Abatutsi mu Rwanda, ingaruka za Jenoside n'uruhare rw’urubyiruko mu kubaka u Rwanda twifuza ndetse no gukomeza kugendera kure abahakana ndetse n'abapfobya jenoside yakorewe Abatutsi.

Urubyiruko rwibukijwe ko rufite uruhare rukomeye mu kubaka Ubumwe bw’Abanyarwanda, mu kurwanya ihakana n’ipgfobya bya Jenoside no mu kunyomoza abagoreka amateka y’u Rwanda bayavuga uko atari ku bw’inyungu zabo.

Binyuze mu buryo bwa "Panel" urubyiruko ruhabwa ikiganiro ku mateka ya Jenoside yakorewe Abatutsi, ingaruka za Jenoside ku bayirokotse no ku muryango Nyarwanda n'uruhare rw'urubyiruko mu kurwanya abahakana n'abapfobya Jenoside.

Umuyobozi nshingwabikorwa ushinzwe Ubumwe, itorero n'uburere mboneragihugu muri MINUBUMWE  Madamu Anita KAYIRANGWA ati: "Jenoside yasize ibikomere byinshi: imfubyi, abapfakazi, abana bavuka ku babyeyi bagize uruhare muri Jenoside yakorewe Abatutsi, incike ... Igihango urubyiruko mufite rero ni ukubaka igihugu, ni ukubaka ubumwe, amateka tuyibuke ariko tuyigireho; tuzirikane ko urugamba rwo kubohora u Rwanda rwatangijwe kuko ubumwe bw’Abanyarwanda bwari bwarasenyutse. Jenoside ntizasubire ukundi. Urugamba rwo kurwanya ihakana n'ipfobya rya Jenoside ruracyariho, tugomba kururwana; urubyiruko ni mwe bo gufata iyambere mu kubanyomoza mukoresheje imbuga nkoranyambaga. U Rwanda rwahisemo kuba Umwe; Jenoside ntizasubira ukundi."

Ibiganiro byashojwe urubyiruko rwiyemeje gukoresha imbuga nkoranyambaga mu buryo bwiza bavuga amateka y’u Rwanda uko ari, baharanira gusigasira ubumwe bw’Abanyarwanda, barangwa n’urukundo muri bagenzi babo. Biyemeje gutanga umusanzu mu kubaka u Rwanda rushya ruzira umwiryane, ivangura n’urwango.

Ibikorwa by’igihango cy’urungano byabimburiwe no kunamira no gushyira indabo ku Rwibutso rwa Genocide rwa Rusiga, aharuhukiye imibiri 6415 y’abishwe muri Genocide.