Mu mirenge yose y’Akarere hasojwe ku mugaragaro Urugerero rudaciye ingando rw’Inkomezabigwi z’icyiciro cya 13, igikorwa cyagaragayemo uruhare rukomeye rw’urubyiruko mu bikorwa by’iterambere n’imibereho myiza y’abaturage.

Umuhango nyamukuru wabereye mu Murenge wa Bushoki, aho Umuyobozi w’Akarere, Madamu MUKANYIRIGIRA Judith, ari kumwe n’abagize Komite y’Umutekano Itaguye ku rwego rw’Akarere, bifatanyije n’Inkomezabigwi mu birori byo gusoza uru rugerero.

Mu ijambo rye, Umuyobozi w’Akarere yashimiye abitabiriye urugerero ku murava bagaragaje mu gihe cyose bamaze bakora ibikorwa bitandukanye bifitiye akamaro abaturage, birimo ibikorwa by’umuganda, ubukangurambaga ku mibereho myiza, isuku n’isukura, kurwanya ibiyobyabwenge ndetse no kwimakaza ubumwe n’ubwiyunge.

Yagize ati: “Igihugu kibafiteho icyizere nk’urubyiruko rufite imbaraga n’ubushobozi bwo guteza imbere umuryango nyarwanda. Mukomeze kurangwa n’indangagaciro z’umuco wacu, mwirinde ingeso mbi zangiza ejo hazaza hanyu, kandi mube urugero rwiza mu bandi.”

Abitabiriye urugerero na bo bagaragaje ko bungutse byinshi birimo ubumenyi ku ndangagaciro, gukorera hamwe, gukunda igihugu no kugira uruhare mu iterambere ry’aho batuye. Bavuze ko biteguye gukomeza kuba umusemburo w’impinduka nziza mu muryango nyarwanda.

Abagize Komite y’Umutekano bashimangiye ko urubyiruko rufite uruhare rukomeye mu kubungabunga umutekano, barusaba gukomeza gutanga amakuru ku gihe no kwirinda icyatuma rwinjira mu bikorwa by’urugomo cyangwa ibinyuranyije n’amategeko.

Urugerero rw’Inkomezabigwi ni gahunda igamije gutoza urubyiruko indangagaciro z’ubunyarwanda, gukunda umurimo no kugira uruhare mu iterambere ry’igihugu, bityo rukaba umusingi w’ejo hazaza heza h’u Rwanda.